କ୍ରଶର ପାଚେରି ଭୁଶୁଡ଼ି ୫ ଶ୍ରମିକ ମୃତ

ଝାନ୍ସୀ: ଉତ୍ତରପ୍ରଦେଶର ଝାନ୍ସୀ ଜିଲା ବରୁଆସାଗର ଥାନା ଅଞ୍ଚଳରେ ଶନିବାର ଏକ କ୍ରଶରର ନିର୍ମାଣାଧୀନ ପାଚେରି ଭୁଶୁଡ଼ି ୫ ଶ୍ରମିକଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ୨ ପୁରୁଷ ଏବଂ ୩ ମହିଳା ଶ୍ରମିକ ରହିଛନ୍ତି। ସେମାନଙ୍କ ନାମ ସୁଖଲାଲ, କମଲେଶ, ସୁନୀତା, ପୂଜା ଏବଂ ଉମା ବୋଲି ଜଣାପଡ଼ିଛି। ପାଚେରି ଭଗ୍ନାଂଶ ତଳେ ଆହୁରି କିଛି ଶ୍ରମିକ ଚାପି ହୋଇ ରହିଥିବା ଆଶଙ୍କା କରାଯାଉଛି। ଦୁର୍ଘଟଣାରେ ଆହତ ହୋଇଥିବା ଅନ୍ୟ କେତେଜଣ ଶ୍ରମିକଙ୍କୁ ଝାନ୍ସୀ ମେଡିକାଲରେ ଭର୍ତ୍ତି କରାଯାଇଛି। ଆଇଜି, ଏସଏସପି ଏବଂ ଜିଲା ମାଜିଷ୍ଟ୍ରେଟ ହସ୍ପିଟାଲରେ ପହଞ୍ଚି ଆହତଙ୍କ ସ୍ବାସ୍ଥ୍ୟାବସ୍ଥା ପଚାରି ବୁଝିଛନ୍ତି।

ସ୍ଥାନୀୟ ଲୋକଙ୍କ ସୂଚନା ଅନୁସାରେ, ପଥର କ୍ରଶରର ପାଚେରି ନିର୍ମାଣ କାର୍ଯ୍ୟରେ ଶ୍ରମିକମାନେ ନିୟୋଜିତ ଥିଲେ। ଶନିବାର ସେମାନେ ପାଚେରି କାନ୍ଥ ପ୍ଲାଷ୍ଟର କରୁଥିଲେ। ଏହି ସମୟରେ ପାଚେରିର କିଛି ଅଂଶ ଭୁଶୁଡ଼ି ପଡ଼ିଥିଲା। ଘଟଣା ସ୍ଥଳରେ ୫ ଶ୍ରମିକ ଚାପି ହୋଇ ପ୍ରାଣ ହରାଇଥିଲେ। ଖବର ପାଇ ପୁଲିସ ଏବଂ ଅଗ୍ନିଶମ କର୍ମଚାରୀ ପହଞ୍ଚି ଉଦ୍ଧାର କାର୍ଯ୍ୟ କରିବା ସହିତ ଆହତମାନଙ୍କୁ ହସ୍ପିଟାଲ ପଠାଇଥିଲେ। ମୃତ୍ୟୁ ସଂଖ୍ୟା ବଢ଼ିବା ଆଶଙ୍କା ରହିଛି।

Comments
Loading...