ଅମ୍ଳଜାନ ଅଭାବ; ଗୋଆରେ ୨୪ ଘଣ୍ଟାରେ ୪୧ ରୋଗୀ ମୃତ                                  

ଦେଶରେ ଅମ୍ଳଜାନ ସଙ୍କଟ ଏବେ ବି ଦୂର ହୋଇନାହିଁ। ବିଭିନ୍ନ ରାଷ୍ଟ୍ରରୁ ସହାୟତା ସତ୍ବେ ଦେଶରେ ଅମ୍ଳଜାନ ଅଭାବରୁ ରୋଗୀଙ୍କ ମୃତ୍ୟୁ ଘଟୁଛି। ଗୋଆ ଚିକିତ୍ସା ମହାବିଦ୍ୟାଳୟ ଏବଂ ଡାକ୍ତରଖାନାରେ ଅମ୍ଳଜାନ ଅଭାବରୁ ୨୪ ଘଣ୍ଟା ମଧ୍ୟରେ ୪୧ ରୋଗୀଙ୍କ ମୃତ୍ୟୁ ଘଟିଛି।

ଗୋଆରେ ଅମ୍ଳଜାନ ଅଭାବରୁ ବାରମ୍ବାର ରୋଗୀ ମୃତ୍ୟୁ ଘଟଣା ସାମ୍ନାକୁ ଆସୁଛି। ଗୁରୁବାର ପ୍ରଥମେ ଏଠାରେ ଅମ୍ଳଜାନ ଅଭବାରୁ ୨୬ ରୋଗୀଙ୍କ ମୃତ୍ୟୁ ହୋଇଥିଲା। ପୁଣି ରାତି ୨ଟାରୁ ସକାଳ ୬ଟା ମଧ୍ୟରେ ଆଉ ୧୫ ରୋଗୀଙ୍କ ମୃତ୍ୟୁ ଘଟିଛି। ଏ ସମ୍ପର୍କରେ ରାଜ୍ୟ ସରକାରଙ୍କ ପକ୍ଷରୁ ବମ୍ବେ ହାଇକୋର୍ଟର ଗୋଆ ଖଣ୍ଡପୀଠଙ୍କୁ ଅବଗତ କରାଯାଇଛି।

ସରକାରଙ୍କ ପକ୍ଷରୁ କୋର୍ଟଙ୍କୁ କୁହାଯାଇଛି ଯେ,​‌ ଅମ୍ଳଜାନ ଚାପ ହ୍ରାସ ପାଇବାରୁ ଅଧିକାଂଶ ରୋଗୀଙ୍କ ମୃତ୍ୟୁ ଘଟିଛି। ଗୋଆର ପରିସ୍ଥିତିକୁ ଦୃଷ୍ଟିରେ ରଖି ଆବଶ୍ୟକ କୋଟା ଅନୁସାରେ ଅମ୍ଳଜାନ ଯୋଗାଣ କରିବା ଲାଗି କୋର୍ଟ କେନ୍ଦ୍ର ସରକାରଙ୍କୁ ନିର୍ଦେଶ ଦେଇଛନ୍ତି। ବିଚାରପତି ନିତିନ ଡବ୍ଲ୍ୟୁ ସାବ୍ରେ ଏବଂ ଏମ.ଏସ. ସୋନାକଙ୍କ ଖଣ୍ଡପୀଠ କହିଥିଲେ ଯେ, ଗତ ୧୨ ତାରିଖରେ କୋର୍ଟଙ୍କ ଆଦେଶ ପରେ ବି ଗୁରୁବାର ପ୍ରାୟ ୪୦ କରୋନା ରୋଗୀ ଅମ୍ଳଜାନ ଅଭାବରୁ ପ୍ରାଣ ହରାଇଛନ୍ତି। ପ୍ରଶାସନିକ ଅବହେଳାରୁ ଏଭଳି ଘଟୁଥିବା ସ୍ପଷ୍ଟ ହେଉଛି।

ଅନ୍ୟପଟେ ରାଜ୍ୟ ସରକାର ଡାକ୍ତରଖାନାକୁ ଅମ୍ଳଜାନ ଯୋଗାଣ ନେଇ ଏକ କମିଟି ଗଠନ କରିଛନ୍ତି। କମିଟି ୩ ଦିନ ମଧ୍ୟରେ ରିପୋର୍ଟ ଦେବାକୁ ରାଜ୍ୟ ସରକାର ନିର୍ଦେଶ ଦେଇଛନ୍ତି। ଡାକ୍ତରଖାନାକୁ ମିଳିବାକୁ ଥିବା ଅମ୍ଳଜାନର ଯୋଗାଣ ଏବଂ ଅମ୍ଳଜାନକୁ ନେଇ ଉପୁଜୁଥିବା ସମସ୍ୟା ଦୂର କରିବା ଦିଗରେ ଏହି କମିଟି କାର୍ଯ୍ୟ କରିବ।

Comments are closed.