ହୀରାକୁଦ ଜଳ ଭଣ୍ଡାରରେ କମୁଛି ଜଳସ୍ତର, ସ୍ଥିତି ସୁଧୁରିବାକୁ ଲାଗିବ ଆଉ ୪ ଦିନ

ଭୁବନେଶ୍ୱର : ଲଗାଣ ବର୍ଷା ସହ ମହାନଦୀର ଉପରମୁଣ୍ଡରେ ପ୍ରବଳ ବର୍ଷା କାରଣରୁ ରାଜ୍ୟରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ତେବେ ରାଜ୍ୟରେ ଜାରି ରହିଥିବା ବନ୍ୟା ପରିସ୍ଥିତିର ସୁଧାର ଆସିବାକୁ ଆହୁରି ୪ ଦିନ ଲାଗିବ ବୋଲି ସୂଚନା ଦେଇଛନ୍ତି  ଜଳସଂପଦ ସର୍ବୋଚ୍ଚ ଯନ୍ତ୍ରୀ ଜ୍ୟୋତିର୍ମୟ ରଥ । ସେ କହିଛନ୍ତି ଯେ ବର୍ତ୍ତମାନ  ମହାନଦୀ ଉପର ମୁଣ୍ଡରେ ଆଉ ବର୍ଷା ହେଉନାହିଁ। ଯାହା ଫଳରେ ହୀରାକୁଦ ଜଳ ଭଣ୍ଡାରରେ ଜଳସ୍ତର ମଧ୍ୟ ହ୍ରାସ ପାଉଛି।

ଗତକାଲି ହୀରାକୁଦକୁ ୯ଲକ୍ଷ କ୍ୟୁସେକ ଜଳ ପ୍ରବେଶ କରୁଥିଲା । ପ୍ରଥମେ ୪୬ଟି ଗେଟ୍ ଖୋଲିଥିବା ବେଳେ ଏବେ ୩୪ଟି ଗେଟ ଖୋଲା ଅଛି । ଏବେ ହୀରାକୁଦରେ ଜଳପତ୍ତନ କମୁଛି । ଡ୍ୟାମର ଜଳଧାରଣା କ୍ଷମତା ୬୩୦ ଫୁଟ ଥିବା ବେଳେ ଜଳପତ୍ତନ ଏବେ ୬୧୭.୦୮ ଫୁଟ ରହିଛି । ଡ୍ୟାମକୁ ୫ ଲକ୍ଷ ୩ ହଜାର ୧୦୯ କ୍ୟୁସେକ ଜଳ ପଶୁଛି । ଏଥିସହ ଡ୍ୟାମରୁ ୫ ଲକ୍ଷ ୯୮ ହଜାର ୪୦୯ କ୍ୟୁସେକ ଜଳ ନିଷ୍କାସିତ ହେଉଛି । ଏଥିସହ ୩୪ଟି ଗେଟ୍‌ରେ ୬ ଲକ୍ଷ କ୍ୟୁସେକ ଜଳ ଛଡ଼ାଯାଉଛି । ମୁଣ୍ଡଳୀରେ ୧୦ ଲକ୍ଷ ୨୬ ହଜାର କ୍ୟୁସେକ ଜଳ ଯାଉଛି । ଏହା ଦିନ ଦୁଇଟା ପର୍ଯ୍ୟନ୍ତ ଚାଲୁ ରହିବ । ଏବେ ସୁଦ୍ଧା ରାଜ୍ୟର ବିଭିନ୍ନ ସ୍ଥାନରେ ୩୬ଟି ଘାଇ ସୃଷ୍ଟି ହୋଇଛି । ଆହୁରି ଅଧିକ ଘାଇ ସୃଷ୍ଟି ହୋଇଥାନ୍ତା, କିନ୍ତୁ ଅନୁଭୂତି ସଂପନ୍ନ ଅଫିସରଙ୍କ ପାଇଁ କମିଛି । ମହାନଦୀ ସିଷ୍ଟମରେ ୫ଟି ଘାଇ ସୃଷ୍ଟି ହୋଇଛି । ସ୍ଥିତି ସୁଧୁରିବାକୁ ଆଉ ୪ ଦିନ ଲାଗିବ ବୋଲି ଜଳସଂପଦ ସର୍ବୋଚ୍ଚ ଯନ୍ତ୍ରୀ ଜ୍ୟୋତିର୍ମୟ ରଥ ସୂଚନା ଦେଇଛନ୍ତି ।

ଜଳସଂପଦ ସର୍ବୋଚ୍ଚ ଯନ୍ତ୍ରୀ ଜ୍ୟୋତିର୍ମୟ ରଥ ଆହୁରି ମଧ୍ୟ କହିଛନ୍ତି ଯେ ପ୍ରତି ଜାଗାରେ ଫ୍ଲଡ଼ ଫାଇଟିଂ ମ୍ୟାଟେରିଆଲ ଅଛି । ବହୁ ନଦୀରେ ବିପଦ ସଂକେତ ଉପରେ। ବାମ ପଟରେ କଟକ, ଜଗତସିଂହପୁର, କେନ୍ଦ୍ରାପଡାକୁ ପାଣି ଯାଉଛି। ପାଣି ନିଷ୍କାସନ ହେବାକୁ ୪ ଦିନ ସମୟ ଲାଗିବ। ଆଜି ୧୦ ଟି ଘଳିଆ ମାରିଛନ୍ତି ଅଧିକାରୀ ମାନେ । ଦୟା ଓ କେନ୍ଦ୍ରାପଡାରେ ଘଳିଆ ମରାଯାଇଛି । ବର୍ତମାନ ହୀରାକୁଦର ଜଳସ୍ତର ୬୧୭:୦୮ ଫୁଟ ଅଛି । ବୈତରଣୀରେ ଅଧିକ ଜଳ ଆସିଥିଲା । ରେଙ୍ଗାଳୀର ସବୁ ଗେଟ ବନ୍ଦ ରହିଛି।

Comments
Loading...