ବୀରବଲ ହତ୍ୟାକାଣ୍ଡ ମାମଲା: ତିନି ଅଭିଯୁକ୍ତ ଗିରଫ୍‍

ପୂର୍ବ ଶତୃତାକୁ ନେଇ ଘଟିଥିଲା ହତ୍ୟାକାଣ୍ଡ

ବ୍ରଜରାଜନଗର:- ବୀରବଲ ପାଣ୍ଡେ ହତ୍ୟାକାଣ୍ଡର ୩ ଜଣ ଅଭିଯୁକ୍ତଙ୍କୁ ପୋଲିସ ଗିରଫ କରି ଆଜି କୋର୍ଟ ଚାଲାଣ କରିବାରେ ସଫଳ ହୋଇଛି।  ଏହି ହତ୍ୟାକାଣ୍ଡ ପଛର କାରଣ ପୂର୍ବ ଶତୃତା ବୋଲି ସ୍ପଷ୍ଟ ହୋଇଛି। ଗିରଫ ଅଭିଯୁକ୍ତମାନେ ହେଲେ ବୁଢିଜାମ ଅଂଚଳର ଅଜିତ ସିଂହ (୨୨) ଓରଫ ମାଣିଆ , ହନୁମାନ ନଗରର ଅଜିତ ସିଂହ (୨୫) ଓରଫ୍‍ ଖାଡ଼ି ଓ ସୁରଜ ପ୍ରସାଦ (୨୫)। ସେହି ପରି ଏହି ଘଟଣାରେ ସମ୍ପୃକ୍ତ ଥିବା ଅନ୍ୟ ଜଣେ ଅଭିଯୁକ୍ତ ଜୟରାମ ରାଏ ବର୍ତମାନ ସୁଦ୍ଧା ଫେରାର ରହିଛି ଓ ଖୁବ ଶୀଘ୍ର ତାକୁ ଗିରଫ୍‍ କରାଯିବ ବୋଲି ପୋଲିସ ପକ୍ଷରୁ ଜାରି ହୋଇଥିବା ପ୍ରେସ ବିଜ୍ଞପ୍ତିରେ ସୂଚନା ପ୍ରଦାନ କରାଯାଇଛି। ଅପରପକ୍ଷେ ସମସ୍ତ ଅଭିଯୁକ୍ତ ବିହାର ରାଜ୍ୟ ମୂଳ ବାସିନ୍ଦା ବୋଲି ଜଣା ପଡ଼ିଛି।

ସୂଚନା ଯୋଗ୍ୟ ଯେ, ଗତ ୨୩ ତାରିଖ ଦିନ ସଂନ୍ଧ୍ୟା ଗୁରୁବାର ବଜାର ପାଖ ଦେଇ ଜଣେ ଯୁବକ ବାଇକରେ ଯାଉଥିବା ସମୟରେ ତାକୁ ନିଶାଶକ୍ତ ଅବସ୍ଥାରେ ଥିବା କେତେକ ଯୁବକ ଅଟକାଇ ତାର ମୋବାଇ ଛଡ଼ାଇ ନେଇଥିଲେ। ପରେ ଉକ୍ତ ମୋବାଇଲରୁ ମୃତ ବୀରବଲଙ୍କ ଫୋନ କରି ଅଶ୍ଳୀଳ ଭାଷାରେ ଗାଳି ଗୁଳଜ କରି ସେ କେଉଁଠି ଅଛି ବୋଲି ଧମକାଇଥିଲେ। ବୀରବଲ ଆଦର୍ଶ ନଗର ପଡ଼ିଆରେ ଭଲବଲ ଖେଲୁଥିବା ନେଇ ସେମାନଙ୍କୁ ସୂଚନା ଦେବା ପରେ ସେମାନେ ସେଠାକୁ ପହଂଚିଥିଲେ ଓ ତାଙ୍କ ମଧ୍ୟରେ ପ୍ରବଳ ପାଟିତୁଣ୍ଡ ଓ ଯୁକ୍ତିତର୍କ ହୋଇଥିଲା। ଏହା ପରେ ନିଶାସକ୍ତ ଯୁବକମାନେ ଉତକ୍ତ ହୋଇ ବୀରବଲକୁ ତୀକ୍ଷ୍ଣ ଛୁରାରେ ଅତର୍କିତ ଭାବେ ଆକ୍ରମଣ କରିଥିଲେ। ବୀରବଲର ବେକରେ ଗଭୀର ଆଘାତ ଲାଗିବାରୁ ଡ଼ାକ୍ତରଖାନା ନିଆଯାଇଥିଲା। ହେଲେ ଅବସ୍ଥା ସଙ୍କଟାପନ୍ନ ହେବାରୁ ତାକୁ ବୁର୍ଲା ଡ଼ାକ୍ତରଖାନା ସ୍ଥାନାଂତରଣ କରାଯାଉଥିବା ସମୟରେ ବୀରବଲଙ୍କ ମୃତ୍ୟୁ ଘଟିଥିଲା।

Comments
Loading...