ଆସାମର ବିଭିନ୍ନ ବନ୍ଦୀ ଗୃହରେ ଅଟକ ଥିବା ୩୫୦ରୁ ଅଧିକ ବନ୍ଦୀଙ୍କୁ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଜାମିନ ବଳରେ ମୁକ୍ତ କରାଯାଇଥିବା ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ କହିଛନ୍ତି। ରାଜ୍ୟସଭାରେ ଏକ ପ୍ରଶ୍ନର ଲିଖିତ ଉତ୍ତରରେ ରାୟ କହିଛନ୍ତି ଯେ ଭାରତର ସର୍ବୋଚ୍ଚ ନ୍ୟାୟାଳୟଙ୍କ ଏପ୍ରିଲ ୧୩, ୨୦୨୦ ଆଦେଶ ଅନୁଯାୟୀ ଆସାମର ବିଭିନ୍ନ ବନ୍ଦୀ ଗୃହରେ ରହୁଥିବା ୩୫୦ ବନ୍ଦୀଙ୍କୁ ଜାମିନ ମଞ୍ଜୁର କରାଯାଇଛି।
ସୁପ୍ରିମକୋର୍ଟ ଏପ୍ରିଲ ୧୩, ୨୦୨୦ରେ ନିଜ ଆଡୁ ଆଗତ ପିଟିସନରେ ଦର୍ଶାଯାଇଛି ଯେ ଦୁଇ ବର୍ଷ ଧରି ବନ୍ଦୀ ଥିବା କଏଦୀ କିମ୍ବା ବନ୍ଦୀମାନଙ୍କୁ ସର୍ତ୍ତ ଅନୁଯାୟୀ ମୁକ୍ତ ହେବାର ଅଧିକାର ମିଳିବ। ଭାରତୀୟ ନାଗରିକଙ୍କ ପାଇଁ ଯାହା ପ୍ରଯୁଜ୍ୟ ସେହିଭଳି ସମାନ ପରିମାଣର ଅର୍ଥାତ ୫ ହଜାର ଟଙ୍କାର ବଣ୍ଡ ଏବଂ ଦୁଇ ଜଣଙ୍କ ମୁଚାଲିକାରେ ଜାମିନ ପ୍ରଦାନ କରାଯିବ ବୋଲି ସୁପ୍ରିମକୋର୍ଟ କହିଥିଲେ।
ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାୟ ଏହା ମଧ୍ୟ କହିଛନ୍ତି ଯେ ଗତ ୨ ବର୍ଷ ମଧ୍ୟରେ ୨୦୨୦ ସେପ୍ଟେମ୍ବର ୧୬ ପର୍ଯ୍ୟନ୍ତ ରାଜ୍ୟର ବିଭିନ୍ନ ଡାକ୍ତରଖାନାରେ ଚିକିତ୍ସିତ ହେଉଥିବା ବେଳେ ୧୫ ଜଣ ବନ୍ଦୀଙ୍କର ମୃତ୍ୟୁ ଘଟିଛି। ରାଜ୍ୟସଭାରେ ଏମଡ଼ିଏମକେ ସାଂସଦ ଭାଇକୋ ଏକ ପ୍ରଶ୍ନରେ କରୋନା ମହାମାରୀ ହେତୁ ଆସାମର ଅଟକ କେନ୍ଦ୍ରରୁ ବିଦେଶୀମାନଙ୍କୁ ମୁକ୍ତ କରିବାର ଆଦେଶ ପାଳନ କରାଯାଇଛି କି ବୋଲି ପଚାରିଥିଲେ।