ମାର୍ଚ୍ଚ ପହିଲାରୁ ଅନ୍‌ଲାଇନ୍‌ରେ ପଢିବେ +୩ ପ୍ରଥମ ବର୍ଷ ବିଦ୍ୟାର୍ଥୀ

ଭୁବନେଶ୍ବର:ଉଚ୍ଚଶିକ୍ଷା ବିଭାଗ ଅଧୀନରେ ଥିବା ରାଜ୍ୟର ସମସ୍ତ ମହାବିଦ୍ୟାଳୟ ଓ ବିଶ୍ବବିଦ୍ୟାଳୟ ପକ୍ଷରୁ ଆସନ୍ତା ମାର୍ଚ୍ଚ ପହିଲାରୁ ସ୍ନାତକ(ୟୁଜି) ପ୍ରଥମ ବର୍ଷ ଛାତ୍ରଛାତ୍ରୀଙ୍କର ପାଠପଢା ଆରମ୍ଭ ହେବ। ତେବେ ପାଠପଢା ଅନ୍‌ଲାଇନ୍‌ରେ ଅନୁଷ୍ଠିତ ହେବ। କରୋନା ସ୍ଥିତି ଯୋଗୁଁ ବିଭାଗ ପକ୍ଷରୁ ଏଭଳି ନିଷ୍ପତ୍ତି ନିଆଯାଇଛି। ଏନେଇ ବିଭାଗ ପକ୍ଷରୁ ରାଜ୍ୟର ସମସ୍ତ ମହାବିଦ୍ୟାଳୟ ଅଧ୍ୟକ୍ଷ ଓ ବିଶ୍ବବିଦ୍ୟାଳୟ କୁଳପତିଙ୍କୁ ଅବଗତ କରାଯାଇଛି। ଏନେଇ ଉଚ୍ଚଶିକ୍ଷା ସଚିବ ବୁଧବାର ଚିଠି ଲେଖିଛନ୍ତି।

ଚିଠିରେ ଉଲ୍ଲେଖ କରିଛନ୍ତି ଯେ, ଯେ, ଜାନୁୟାରୀ ୧୧ରୁ ୟୁଜି ଓ ସ୍ନାତକୋତ୍ତର(ପିଜି) ଶେଷବର୍ଷ ,ଚଳିତ ମାସ ୧୦ରୁ ପିଜି ପ୍ରଥମ ଓ ୟୁଜି ଦ୍ବିତୀୟ ବର୍ଷ ବିଦ୍ୟାର୍ଥୀଙ୍କର ଶ୍ରେଣୀଗୃହ ପାଠପଢା ଆରମ୍ଭ ହୋଇଛି। ତେବେ ଏପର୍ୟ୍ୟନ୍ତ କରୋନା ସ୍ଥିତି ରାଜ୍ୟରେ ସମ୍ପୂର୍ଣ୍ଣ ନିୟନ୍ତ୍ରଣକୁ ଆସିନି। ସେଥିଯୋଗୁଁ ୟୁଜି ପ୍ରଥମ ବର୍ଷ ଛାତ୍ରଛାତ୍ରୀଙ୍କର ଶ୍ରେଣୀଗୃହ ପାଠପଢା ଏବେକାର ପରିସ୍ଥିତିରେ ଆରମ୍ଭ କରିବା ସମ୍ଭବ ନୁହେଁ। ତେବେ ନୂତନ ଭାବେ ନାମ ଲେଖାଇଥିବା ଛାତ୍ରଛାତ୍ରୀଙ୍କର ପାଠପଢା ବହୁଳ ଭାବେ ପ୍ରଭାବିତ ହେବାର ଆଶଙ୍କା ରହିଛି। ସେଥିଯୋଗୁଁ ୟୁଜି ପ୍ରଥମ ବର୍ଷ ଛାତ୍ରଛାତ୍ରୀଙ୍କର ଅନ୍‌ଲାଇନ୍‌ ମୋଡରେ ପାଠପଢା ଆସନ୍ତା ମାର୍ଚ୍ଚ ପହିଲାରୁ ଆରମ୍ଭ କରିବାକୁ ନିଷ୍ପତ୍ତି ନିଆଯାଇଛି। ପାଠ୍ୟଖସଡ଼ା ମୁତାବକ ପାଠପଢା ପାଇଁ ପ୍ରସ୍ତୁତ କରିବାକୁ ଶିକ୍ଷାନୁଷ୍ଠାନ କର୍ତ୍ତୃପକ୍ଷଙ୍କୁ କୁହାଯାଇଛି। ବିଭାଗର ପୂର୍ବ ନିର୍ଦେଶ ମୁତାବକ ପାଠ୍ୟକ୍ରମର ୨୫ %(ସବୁ ୟୁନିଟ୍‌ର ୨୫%) ସେଲ୍ଫ ଷ୍ଟଡି କରିବାକୁ ଚିଠିରେ ଉଲ୍ଲେଖ ରହିଛି।

Comments
Loading...