ପାକିସ୍ତାନରେ ବିସ୍ଫୋରଣ, ୨୧ ମୃତ

ଇସ୍‌ଲାମାବାଦ: ପାକିସ୍ତାନର କ୍ୱେଟା ଅନ୍ତର୍ଗତ ହାଜରଗଞ୍ଜି ପରିବା ମାର୍କେଟରେ ଶୁକ୍ରବାର ବିସ୍ଫୋରଣ ଘଟି ୨୧ ଜଣ ପ୍ରାଣ ହରାଇଛନ୍ତି ଓ ୫୦ ଜଣ ଆହତ ହୋଇଛନ୍ତି। ଏଠାକାର ହାଜରା ସମ୍ପ୍ରଦାୟକୁ ଟାର୍ଗେଟ କରି ଏହି ବିସ୍ଫୋରଣ ଘଟା ଯାଇଥିଲା ବୋଲି ଡିଆଇଜି ଅବଦୁଲ ରଜାକ ଛିମା ସୂଚନା ଦେଇଥିବା ଏଠାକାର ପ୍ରମୁଖ ଗଣମାଧ୍ୟମ ‘ଡନ୍‌’ ଖବର ପ୍ରକାଶ କରିଛି। ସୂଚନା ଅନୁସାରେ ଏଠାକାର ଏକ ଦୋକାନରେ ଥିବା ଆଳୁ ବସ୍ତା ଭିତରେ ବୋମା ଖଞ୍ଜାଯାଇଥିଲା। ତେବେ ଏହା ଟାଇମ ବୋମା ଅଥବା ରିମୋଟ କଣ୍ଟ୍ରୋଲ ପରିଚାଳିତ ବୋମା ତାହା ସ୍ପଷ୍ଟ ହୋଇ ନ ଥିବା ଡିଆଇଜି କହିଛନ୍ତି। ମୃତକଙ୍କ ମଧ୍ୟରେ ବେଲୁଚିସ୍ତାନ ରାଜଧାନୀ ​‌େ​‌କ୍ବଟ୍ଟାର ୭ ଜଣ ଅନ୍ତର୍ଭୁକ୍ତ। ଏମାନେ ହାଗରା ସମ୍ପ୍ରଦାୟର ବୋଲି କୁହାଯାଉଛି। ବିସ୍ଫୋରଣରେ ଆଖପାଖ ଅଟ୍ଟାଳିକାଗୁଡିକ ଧ୍ବଂସ ହୋଇଯାଇଛି। ଉଦ୍ଧାରକାରୀଦଳ ଓ ପୁଲିସ ଘଟଣାସ୍ଥଳରେ ପହଞ୍ଚି ଆହତମାନଙ୍କୁ ନିକଟସ୍ଥ ବାଲାନ ମେଡିକାଲରେ ଭର୍ତ୍ତି କରିଛନ୍ତି। ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା ରହିଛି ବୋଲି ସୁରକ୍ଷା ବାହିନୀ ପକ୍ଷରୁ କୁହାଯାଇଛି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ ଓ ବେଲୁଚିସ୍ତାନ ମୁଖ୍ୟମନ୍ତ୍ରୀ ଜାମ କମଳ ଏହି ଆକ୍ରମଣର ଦୃଢ ନିନ୍ଦା କରିଛନ୍ତି।

Comments
Loading...