ରାଜ୍ୟଗୁଡ଼ିକୁ ୪୫ହଜାର ଅତିରିକ୍ତ ଟିକସ ଭାଗ ଦେଲା କେନ୍ଦ୍ର : ଓଡ଼ିଶା ଭାଗରେ ୨୦୮୩ କୋଟି

ନୂଆଦିଲ୍ଲୀ : ନୂଆ ଆର୍ଥିକ ବର୍ଷ ଆରମ୍ଭରେ ରାଜ୍ୟଗୁଡିକୁ ଟିକସ ଭେଟି ଦେଇଛନ୍ତି କେନ୍ଦ୍ର ସରକାର। କେନ୍ଦ୍ର ସରକାର ସବୁ ରାଜ୍ୟଗୁଡିକ ଲାଗି ୨୦୨୦-୨୧ ଆର୍ଥିକ ବର୍ଷ ପାଇଁ ପ୍ରାୟ ୪୫ହଜାର କୋଟିର ଅତିରିକ୍ତ ଟିକସ ଭାଗ ଦେଇଛନ୍ତି। ଏହା ୨୦୨୦-୨୧ ଆର୍ଥିକ ବର୍ଷର ସଂଶୋଧିତ ଅଟକଳର ତୁଳନାରେ ୮.୨ ପ୍ରତିଶତ ଅଧିକ। ଏହି ଅତିରିକ୍ତ ଟିକସରୁ ଓଡିଶା ଭାଗରେ ୨୦୮୩ କୋଟି ଟଙ୍କା ମିଳିବ। ଗତ ଆର୍ଥିକ ବର୍ଷରେ ଓଡିଶା ନିଜର ଟିକସ ଭାଗ ଆକାରରେ କେନ୍ଦ୍ର ସରକାରଙ୍କ ଠାରୁ ୨୫,୪୬୦ କୋଟି ଟଙ୍କା ପାଇବାର ଅଟକଳ କରାଯାଇଥିଲା; କିନ୍ତୁ ଓଡିଶା ବର୍ତ୍ତମାନର ଅତିରିକ୍ତ ଟିକସକୁ ମିଶାଇ ମୋଟ ୨୭,୫୪୩ କୋଟି ଟଙ୍କା ପାଇବ। ଗତ ଆର୍ଥିକ ବର୍ଷର ୪ର୍ଥ ତ୍ରୟମାସରେ ଟିକସ ଆଦାୟରେ ସୁଧାର ଆସିବା ପରେ ସରକାର ନିଜର ପୂର୍ବ ଅଟକଳକୁ ବୃଦ୍ଧି କରି ରାଜ୍ୟଗୁଡିକୁ ଅତିରିକ୍ତ ଟିକସ ଭାଗ ପ୍ରଦାନ କରିଛନ୍ତି। ଏହି ୪୫ହଜାର କୋଟିର ଟିକସକୁ ଦୁଇଟି କିସ୍ତିରେ ପ୍ରଦାନ କରାଯାଇଛି। ପ୍ରଥମ କିସ୍ତିରେ ୧୪,୫୦୦ କୋଟି ଓ ୨ୟ କିସ୍ତିରେ ୩୦,୫୦୦ କୋଟି ପ୍ରଦାନ କରାଯାଇଛି। ୨୦୨୦-୨୧ ଆର୍ଥିକ ବର୍ଷରେ ରାଜ୍ୟଗୁଡିକୁ ୫ଲକ୍ଷ ୪୯ହଜାର ୯୫୯ କୋଟିର ଟିକସ ଭାଗ ପ୍ରଦାନ କରିବାକୁ ଧାର୍ଯ୍ୟ ହୋଇଥିଲା। ଯାହାକି କେନ୍ଦ୍ର ସରକାରଙ୍କ ମୋଟ ଟିକସର ୪୧%। ପରବର୍ତ୍ତି ସମୟରେ ଏହି ଟିକସ ପରିମାଣକୁ ସଂଶୋଧନ କରାଯାଇ ୫ଲକ୍ଷ ୯୪ହଜାର ୯୯୬ କୋଟିକୁ ବୃଦ୍ଧି କରାଯାଇଥିଲା। ଯାହା ପୂର୍ବ ଅଟକଳ ତୁଳନାରେ ୪୫ ହଜାର କୋଟି ଅଧିକ।

Comments
Loading...