ହାଇଦରାବାଦ : ବିଶ୍ବର ଦ୍ରୁତତମ ମାନବ କାଲ୍କୁଲେଟର ଭାବେ ଲିମ୍କା ବୁକ୍ ଅଫ ରେକର୍ଡସ୍ରେ ସ୍ଥାନ ପାଇଛନ୍ତି ୨୧ବର୍ଷୀୟ ନୀଳକଣ୍ଠ ଭାନୁପ୍ରକାଶ। ସମ୍ପ୍ରତି ଦିଲ୍ଲୀ ବିଶ୍ବବିଦ୍ୟାଳୟ ଅଧୀନ ସେଣ୍ଟ ଷ୍ଟିଫେନ୍ସ କଲେଜେର ଗଣିତ ସମ୍ମାନରେ ସ୍ନାତକ ଅଧ୍ୟୟନ କରୁଥିବା ହାଇଦରାବାଦର ନୀଳକଣ୍ଠ କ୍ଷିପ୍ର ହିସାବ ଯୋଗୁଁ ୪ଟି ବିଶ୍ବ ରେକର୍ଡ ଓ ୫୦ଟି ଲିମ୍କା ରେକର୍ଡର ଅଧିକାରୀ ହେଲେଣି। ସମ୍ପ୍ରତି ଲଣ୍ଡନେର ମାଇଣ୍ଡ ସ୍ପୋର୍ଟସ୍ ଅଲିମ୍ପିଆଡ ଦ୍ବାରା ଆୟୋଜିତ ମେଣ୍ଟାଲ କାଲ୍କୁଲେସନ୍ ୱାର୍ଲଡ୍ ଚମ୍ପିଆନ୍ସିପରେ ସେ ସ୍ବର୍ଣ୍ଣପଦକ ବିଜୟୀ ହୋଇଛନ୍ତି। ସେ ବିଶ୍ବର ଅନ୍ୟ ୨୯ଜଣ ଗଣିତ ବିଶାରଦଙ୍କୁ ପଛରେ ପକାଇଥିବାବେଳେ ତାଙ୍କୁ ୬୫ପଏଣ୍ଟ ମିଳିଛି। ଏ କ୍ଷେତ୍ରରେ ନୀଳକଣ୍ଠ ପ୍ରଥମ ଭାରତୀୟ। ତାଙ୍କ ପୂର୍ବରୁ ଆମେରିକାର ସ୍କଟ ଫ୍ଲାନ୍ସବର୍ଗ ଓ ଭାରତର ଶକୁନ୍ତଳା ଦେବୀ ଏହି ରେକର୍ଡର ଅଧିକାରୀ ଥିଲେ। ଲେବାନନର ଜଣେ ପ୍ରାର୍ଥୀ ଦ୍ବିତୀୟ ସ୍ଥାନ ଅଧିକାର କରିଛନ୍ତି। ୧୯୯୭ରୁ ପ୍ରତିବର୍ଷ ଅନ୍ଲାଇନ୍ରେ ଏହି ଚମ୍ପିଆନ୍ସିପ୍ ଆୟୋଜିତ ହୋଇଥାଏ।
Comments are closed.