କଟକ : ଦୁଇ ବର୍ଷର ଶିଶୁ ପୂର୍ବି ପ୍ରଣଭି ମହାରଣା ଇଣ୍ଡିଆ ବୁକ୍ ଅଫ ରେକର୍ଡସ (ଆଇ.ବି.ଆର)ରେ ନିଜ ନାମ ସ୍ଥାନିତ କରିଛନ୍ତି। ପୂର୍ବିଙ୍କ ପ୍ରଖର ସ୍ମରଣଶକ୍ତିର ପ୍ରତିଭାକୁ ଦେଖି ଆଇ.ବି.ଆର ପକ୍ଷରୁ ତାଙ୍କୁ ଏହି ସମ୍ମାନ ଦିଆଯାଇଛି। ପୂର୍ବି ହେଉଛନ୍ତି ମର୍କତନଗର ସେକ୍ଟର-୧୧ରେ ରହୁଥିବା ପ୍ରିୟବ୍ରତ ମହାରଣା ଓ ସୁମିତ୍ରା ସାହୁଙ୍କ ଏକମାତ୍ର କନ୍ୟା। ୨୦୧୮ ଡିସେମ୍ବର ୨୮ରେ ଜନ୍ମିତ ପୂର୍ବି ମାତ୍ର ୭ ମାସରୁ କଥା କହିବା ଆରମ୍ଭ କରିଥିଲେ। ବର୍ଷେ ପୂରଣ ହେବା ପୂର୍ବରୁ ସେ ସ୍ପଷ୍ଟ କଥା କହିବା ସହିତ ବିଭିନ୍ନ ପନିପରିବାଠାରୁ ଆରମ୍ଭ କରି ଚିତ୍ର, ରଙ୍ଗ, ପଶୁପକ୍ଷୀଙ୍କ ନାମ ଅତି ସହଜରେ ମନେ ରଖୁଥିଲେ। ପୂର୍ବିଙ୍କ ପ୍ରଖର ସ୍ମରଣଶକ୍ତିକୁ ଦେଖି ତାଙ୍କ ମା’ ପୂର୍ବିଙ୍କୁ ବିଭିନ୍ନ ବିଷୟରେ ଅଧିକ ଶିଖାଇବାକୁ ଆଗଭର ହେଲେ। ଏହାପରେ ସେ ଇଣ୍ଡିଆ ବୁକ୍ ଅଫ ରେକର୍ଡସ ସଂକ୍ରାନ୍ତରେ ଜାଣିବା ପରେ ଝିଅର ଏହି ପ୍ରତିଭା ବିଷୟରେ ସୂଚନା ଦେଇଥିଲେ। ଝିଅର ପ୍ରତିଭା ସଂକ୍ରାନ୍ତୀୟ ବିଭିନ୍ନ ଚିତ୍ର (ଭିଡିଓ) ଆଇ.ବି.ଆରକୁ ପଠାଇଥିଲେ। ଏଥିରେ ପୂର୍ବି ଗାଇଥିବା ଜାତୀୟ ସଂଗୀତ ସହିତ ସେ କହିପାରୁଥିବା ଜାତୀୟ ସଙ୍କେତ, ସପ୍ତାହର ୭ଟି ଦିନ, ୫ଟି ଇଂରାଜୀ କବିତା, ପଶୁ ଓ ପକ୍ଷୀଙ୍କ ନାମ, ଗଣନ ସଂଖ୍ୟା, ପନିପରିବା ଓ ଫଳର ନାମ, ଯାନବାହନ ଏବଂ ଶରୀରର ବିଭିନ୍ନ ଅଙ୍ଗପ୍ରତ୍ୟଙ୍ଗର ନାମ ଇତ୍ୟାଦି ରହିଥିଲା। ଏହାକୁ ସମୀକ୍ଷା କରିବା ପରେ ପୂର୍ବିଙ୍କ ନାମ ଆଇ.ବି.ଆର ପକ୍ଷରୁ ମନୋନୀତ କରାଯାଇଥିଲା।
Comments are closed.