ଶ୍ରୀନଗର: ଜାମ୍ମୁ-କାଶ୍ମୀର ଶୋପିଆନ୍ ଜିଲାରେ ସୁରକ୍ଷାକର୍ମୀଙ୍କ ଗୁଳିରେ ଦୁଇ ଜଣ ଆତଙ୍କବାଦୀ ନିହତ ହୋଇଛନ୍ତି। ମୃତକଙ୍କ ମଧ୍ୟରେ ଜଣେ ପୂର୍ବତନ ଭାରତୀୟ ଯବାନ ଥିବା ଜଣାପଡ଼ିଛି। ସେ କିଛି ଦିନ ତଳେ ସେ ଆତଙ୍କବାଦୀ ସଂଗଠନ ହିଜବୁଲ୍ ମୁଜାହିଦ୍ଦିନରେ ଯୋଗ ଦେଇଥିଲେ।
ଦକ୍ଷିଣ କାଶ୍ମୀର ଅଞ୍ଚଳର ଜୈନାପୋରା ଅଞ୍ଚଳରେ କିଛି ଆତଙ୍କବାଦୀ ଲୁଚିଥିବା ଖବର ପାଇଁ ସୁରକ୍ଷା ବାହିନୀ ପକ୍ଷରୁ ତଲାସୀ ଅଭିଯାନ ଆରମ୍ଭ କରାଯାଇଥିଲା। ଏହି ସମୟରେ ଏକ ଘରୁ ଆତଙ୍କବାଦୀମାନେ ସୁରକ୍ଷାକର୍ମୀଙ୍କ ଉପରକୁ ଗୁଳି ଚଳାଇଥିଲେ। ସୁରକ୍ଷାକର୍ମୀମାନେ ପାଲଟା ଗୁଳି ଚାଳନା କରିଥିଲେ। ଏଥିରେ ଦୁଇ ଆତଙ୍କବାଦୀ ନିହତ ହୋଇଥିଲେ।
ମୃତ ଆତଙ୍କବାଦୀମାନେ ହେଲେ ଇଦ୍ରିସ୍ ସୁଲତାନ ଓ ଅମିର ହୁସେନ ରାଥେର। ସୁଲତାନ୍ ଜାମ୍ମୁକାଶ୍ମୀର ଲାଇଟ୍ ଇନଫାଣ୍ଟ୍ରି ରେଜିମେଣ୍ଟରେ ଯବାନ ରୂପେ କାର୍ଯ୍ୟ କରୁଥିଲେ। ସେ ଗତ ଏପ୍ରିଲ୍ ମାସରେ ଆତଙ୍କବାଦୀ ସଂଗଠନରେ ଯୋଗ ଦେଇଥିଲେ। ଆତଙ୍କବାଦୀମାନେ ବିସ୍ଫୋରକ ଖଞ୍ଜିଥିବା ଆଶଙ୍କା କରାଯାଉଥିବାରୁ ସେହି ଅଞ୍ଚଳକୁ ନ ଯିବା ପାଇଁ ଜନସାଧାରଣଙ୍କୁ ଉପଦେଶ ଦିଆଯାଇଛି। ନିହତ ଆତଙ୍କବାଦୀଙ୍କ ନିକଟରୁ ବିପୁଳ ପରିମାଣରେ ଗୋଳାବରୁଦ ଓ ଅସ୍ତ୍ରଶସ୍ତ୍ର ଜବତ କରାଯାଇଛି।
