ଗୁଡାରୀ ଥାନାର ଦୁଇ କର୍ମଚାରୀ ନିଲମ୍ବିତ

ନାଇରା ହତ୍ୟାକାଣ୍ଡ ଘଟଣାରେ ଗିରଫ ମୁଦାଲାଙ୍କ ଆତ୍ମହତ୍ୟା ଉଦ୍ୟମ ହେଲା କାଳ

ଗୁଣପୁର : ଜଣେ ଗିରଫ ମୁଦାଲା ଆତ୍ମହତ୍ୟା ଉଦ୍ୟମ କରିଥିବାରୁ କାର୍ଯ୍ୟରେ ଅବହେଳା ଅଭିଯୋଗରେ ଗୁଡାରୀ ଥାନାର ଦୁଇଜଣ କର୍ମଚାରୀ ନିଲମ୍ବିତ ହୋଇଛନ୍ତି। ଅନ୍ୟପକ୍ଷେ ହତ୍ୟା ଅଭିଯୋଗରେ ଗିରଫ ମୁଦାଲା ଆତ୍ମହତ୍ୟା କରିବା ପରେ ତାଙ୍କ ବିରୋଧରେ ଆଉ ଏକ ମାମଲା ରୁଜୁକରି କୋର୍ଟ ଚାଲାଣ କରାଯାଇ ଥିବା ଜଣା ପଡ଼ିଛି। ମିଳିଥିବା ସୂଚନା ମୁତାବକ ଗତ ୧୩ ତାରିଖ ରାତିରେ ଗୁଡାରୀ ଥାନା ଅନ୍ତର୍ଗତ ନାଇରା ଗ୍ରାମରେ କେତେକ ଦୁର୍ବୁତ୍ତ କିରଣ ଗାଣ୍ଟା ନାମକ ଜଣେ ଯୁବକଙ୍କୁ ଗୁଳିକରି ହତ୍ୟା କରିଥିଲେ। ଏହି ଘଟଣାରେ ତଦନ୍ତ କରି ଗୁଡାରୀ ପୁଲିସ ପ୍ରଥମ ପର୍ଯ୍ୟାୟରେ କିରଣର ଶାଶୁ, ଦୁଇ ସ୍ତ୍ରୀଙ୍କ ସମେତ ୮ଜଣଙ୍କୁ ଗିରଫ କରିଥିଲା। ଦ୍ୱିତିୟ ପର୍ଯ୍ୟାୟରେ ନିଳମ୍ବର ଶବର ନାମକ ଜଣେ ବ୍ୟକ୍ତିଙ୍କୁ ଗିରଫ କରି ଗୁଡାରୀ ଥାନା ହାଜତରେ ରଖିଥିବା ବେଳେ ସେହି ମୁଦାଲା ବେକକାଟି ଆତ୍ମହତ୍ୟା ଉଦ୍ୟମ କରିଥିଲା। ପରେ ଖବର ପାଇ ଥାନା କର୍ତ୍ତୁପକ୍ଷ ଉକ୍ତ ମୁଦାଲାର ଚିକିତ୍ସା କରାଇଥିଲେ। ତେବେ ଆତ୍ମହତ୍ୟା ଉଦ୍ୟମ ଅପରାଧ ପାଇଁ ଏକ ମାମଲା ରୁଜୁ କରି ୩୦୯ ଦଫାରେ କୋର୍ଟ ଚାଲାଣ କରିଥିଲେ। ଏହି ଘଟଣାରେ ଗୁଡାରୀ ଥାନାର ସେଦିନ ଦାୟିତ୍ୱରେ ଥିବା ଏଏସଆଇ ଲୋକନାଥ ଦୋରା ଓ କନେଷ୍ଟବଲ ବିରାଜିନି ପଟ୍ଟନାୟକ ନିଲମ୍ବିତ ହୋଇଛନ୍ତି। ଏ ସମ୍ପର୍କରେ ଏସଡିପିଓ ରାଜ କିଶୋର ଦାସଙ୍କୁ ପଚାରିବାରୁ କାର୍ଯ୍ୟରେ ଅବହେଳା ପାଇଁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ସେ କହିଛନ୍ତି।

Comments are closed.