ଜାଳେଣି ସଂଗ୍ରହ ବେଳେ ଗଛରୁ ପଡ଼ି ୨ ମୃତ

କାଶୀପୁର: ରାୟଗଡା ଜିଲା କାଶୀପୁର ବ୍ଲକ ଗୋଡିବାଲି ପଞ୍ଚାୟତ ଅନ୍ତର୍ଗତ ଚିରକୁଲି ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଛି। ନିତିଦିନ ପରି ଗ୍ରାମ ନିକଟରେ ଥିବା ଏକ ତେନ୍ତୁଳି ଗଛରୁ ଜାଳେଣି କାଠ ସଂଗ୍ରହ କରିବା ବେଳେ ଗଛରୁ ଖସିପଡ଼ି ୨ ଜଣଙ୍କର ମୃତ୍ୟୁ ଘଟିଛି। ମୃତକ ଦ୍ବୟ ହେଲେ ବରି ମାଝି(୩୫) ଏବଂ ଲକ୍ଷ୍ମଣ ମାଝି(୪୦)। ମିଳିଥିବା ସୂଚନା ଅନୁଯାୟୀ, ବରି ଏବଂ ଲକ୍ଷ୍ମଣ ଏକ ଅଧାକଟା ତେନ୍ତୁଳି ଗଛରେ ଚଢି କାଠ କାଟୁଥିବା ସମୟରେ ଭାରସାମ୍ୟ ହରାଇ ଗଛରୁ ତଳେ ପଡିଯାଇଥିଲେ। ଏହା ପରେ ଗଛରୁ ଏଖ ବଡ଼ ଡାଳ ସେମାନଙ୍କ ଉପରେ ପଡ଼ି ଯାଇଥିଲା। ଖବର ପାଇ ସ୍ଥାନୀୟ ଲୋକେ ପହଞ୍ଚି ସେମାନଙ୍କୁ ଡାକ୍ତରଖାନା ନେବା ପୂର୍ବରୁ ସେମାନଙ୍କର ମୃତ୍ୟୁ ହୋଇଯାଇଥିଲା। ଖବର ପାଇ କାଶୀପୁର ପୁଲିସ ପହଞ୍ଚି ଘଟଣାର ତଦନ୍ତ କରିଛି। ଘଟଣାକୁ ନେଇ ଗ୍ରାମରେ ଶୋକାକୂଳ ପରିବେଶ ସୃଷ୍ଟି ହୋଇଛି।

Comments are closed.