ଆସାମ ଓ ପଶ୍ଚିମବଙ୍ଗରେ ପ୍ରଥମ ପର୍ଯ୍ୟାୟ ଭୋଟଗ୍ରହଣ ଜାରି

ନୂଆଦିଲ୍ଲୀ: ଆସାମ ଏବଂ ପଶ୍ଚିମବଙ୍ଗ ବିଧାନସଭା ନିର୍ବାଚନ ଲାଗି ଶନିବାର ପ୍ରଥମ ପର୍ଯ୍ୟାୟ ଭୋଟଗ୍ରହଣ ଆରମ୍ଭ ହୋଇଛି। ଆସାମର ମୋଟ ୧୨୬ ଆସନ ମଧ୍ୟରୁ ୪୭ ଏବଂ ପଶ୍ଚିମବଙ୍ଗରେ ୨୯୪ ଆସନରୁ ୩୦ ଆସନରେ ମତଦାନ ଚାଲିଛି। ଆସାମରେ ପ୍ରଥମ ପର୍ଯ୍ୟାୟ ନିର୍ବାଚନରେ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋୱାଲଙ୍କ ସମେତ ୨୬୪ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ।

ଆସାମରେ ସକାଳ ୧୦ଟା ସୁଦ୍ଧା ୧୦% ଭୋଟଗ୍ରହଣ ହୋଇଥିବାବେଳେ ଶାନ୍ତିଶୃଙ୍ଖଳାରେ ମତଦାନ ଚାଲିଥିବା ସୂଚନା ମିଳିଛି। ଆସାମରେ ଦୁଇ ଜାତୀୟ ଦଳ ବିଜେପି ଏବଂ କଂଗ୍ରେସ ଆଞ୍ଚଳିକ ଦଳଗୁଡ଼ିକୁ ନେଇ ଗଠନ କରିଥିବା ମେଣ୍ଟ ମଧ୍ୟରେ କଡ଼ା ଟକ୍କର ହେବ। ବିଜେପି ନେତୃତ୍ଵାଧୀନ ଆସାମ ଗଣପରିଷଦ ଓ ୟୁନାଇଟେଡ ପିପୁଲ୍ସ ପାର୍ଟି ଲିବେରାଲ ମେଣ୍ଟ ଏବଂ କଂଗ୍ରେସ ନେତୃତ୍ଵାଧୀନ ଏଆଇୟୁଡିଏଫ, ବୋଡୋଲାଣ୍ଡ ପିପୁଲ୍ସ ଫ୍ରଣ୍ଟ, ଆଞ୍ଚଳିକ ଗଣ ମୋର୍ଚ୍ଚା, ଭାରତୀୟ କମ୍ୟୁନିଷ୍ଟ ପାର୍ଟି ଏବଂ ମାର୍କ୍ସବାଦୀ କମ୍ୟୁନିଷ୍ଟ ପାର୍ଟି ମେଣ୍ଟ ଗଠନ ହୋଇଛି।

ଅନ୍ୟପଟେ ପଶ୍ଚିମବଙ୍ଗରେ ସକାଳ ୧୦ଟା ସୁଦ୍ଧା ପ୍ରାୟ ୧୦ ପ୍ରତିଶତ ଭୋଟଗ୍ରହଣ ହୋଇଥିବା ଜଣାପଡ଼ିଛି। ୩୦ ଆସନରେ ୧୯୧ ଆଶାୟୀ ପ୍ରାର୍ଥୀ ମଇଦାନକୁ ଓହ୍ଲାଇଛନ୍ତି। ସେମାନଙ୍କ ମଧ୍ୟରୁ ୨୧ ଜଣ ମହିଳା ଅଛନ୍ତି। ଏହି ପର୍ଯ୍ୟାୟରେ ୭୩ ଲକ୍ଷ ୮୦ ହଜାର ୯୪୨ ଭୋଟର ମତଦାନ କରିବେ।

Comments
Loading...