ଜାମ୍ମୁ କାଶ୍ମୀରରେ ଦଶଦିନ ମଧ୍ୟରେ ସମସ୍ତ ବୟସ୍କଙ୍କୁ ଟିକାକରଣ

ଶ୍ରୀନଗର: ଜାମ୍ମୁ କାଶ୍ମୀରରେ ୪୫ ବର୍ଷରୁ ଅଧିକ ବୟସର ସମସ୍ତ ନାଗରିକଙ୍କୁ ଆଗାମୀ ଦଶଦିନ ମଧ୍ୟରେ କୋଭିଡ ଟିକା ଦିଆଯିବ। ଏହି କାର୍ଯ୍ୟ ଶତ ପ୍ରତିଶତ ସଂପୂର୍ଣ୍ଣ କରିବାକୁ ଉପରାଜ୍ୟପାଳ ମନୋଜ ସିହ୍ନା ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି। ସୋମବାର ଦିନ ରାଜ୍ୟରେ କୋଭିଡ ମୁକାବିଲା ଦିଗରେ ନିଆଯାଉଥିବା ପଦକ୍ଷେପ ସମ୍ପର୍କରେ ସମୀକ୍ଷା କରିବା ଅବସରରେ ଉପରାଜ୍ୟପାଳ ଏହି ସମୟ ସୀମା ଧାର୍ଯ୍ୟ କରିଛନ୍ତି। ଏଥିସହିତ ଜାମ୍ମୁ କାଶ୍ମୀରରେ ଅଧିକ ସଂକ୍ରମଣ ପରିଲକ୍ଷିତ ହେଉଥିବା ଅନ୍ୟ ସହରାଞ୍ଚଳ ଓ ଗ୍ରାମାଞ୍ଚଳକୁ କୋଭିଡ ପରୀକ୍ଷା ସୁବିଧା ସମ୍ପ୍ରସାରିତ କରିବା ଏବଂ ପର୍ଯ୍ୟାୟକୟମେ କୋଭିଡ ରୋଗୀଙ୍କ ଚିକିତ୍ସା ନିମନ୍ତେ ଶଯ୍ୟା ସଂଖ୍ୟା ବୃଦ୍ଧି କରିବାକୁ ସେ ସ୍ୱାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଛନ୍ତି। ନୂଆ ମେଡିକାଲ କଲେଜରେ ଥିବା ଭିତ୍ତିଭୂମି ପୂର୍ଣ୍ଣ ବ୍ୟବହାର ଉପରେ ଗୁରୁତ୍ୱ ଦେଇ ଉପରାଜ୍ୟପାଳ କହିଛନ୍ତି ଯେ ସେଠାରେ ଉପଲବ୍ଧ ସୁବିଧା ସୁଯୋଗ ଯେଭଳି ଏହାର ପାଶ୍ୱର୍ବର୍ତ୍ତୀ ଅଞ୍ଚଳରେ ବାସ କରୁଥିବା ଜନସାଧାରଣଙ୍କ ଚିକିତ୍ସାରେ ଉପଯୋଗ ହୋଇପାରିବ, ତାହା ସୁନିଶ୍ଚିତ କରିବାକୁ ହେବ। ଜାମ୍ମୁ କାଶ୍ମୀରରେ ଆଗାମୀ ଦିନରେ ଅଧିକ ସଂଖ୍ୟାରେ ଅମ୍ଳଜାନ ଉତ୍ପାଦନ ୟୁନିଟ ସ୍ଥାପନ ଏବଂ ସମ୍ମିଳିତ ଭାବରେ କୋଭିଡ ମୁକାବିଲା ଉପରେ ସେ ଗୁରୁତ୍ୱ ଦେଇଛନ୍ତି।

Comments are closed.