୧୮ ରାଜ୍ୟରେ କମୁଛି ଦୈନିକ ସଂକ୍ରମିତଙ୍କ ସଂଖ୍ୟା

ନୂଆଦିଲ୍ଲୀ: ଗତ ପ୍ରାୟ ତିନି ସପ୍ତାହ ଧରି କ୍ରମାଗତ ଭାବରେ ଦେଶର ବିଭିନ୍ନ ରାଜ୍ୟରେ ଦୈନିକ କରୋନା ସଂକ୍ରମିତଙ୍କ ସଂଖ୍ୟା ଆଶାତୀତ ଭାବେ ବୃଦ୍ଧି ପାଇବା ଘଟଣା ଦେଶରେ ମହାମାରୀ ଜନିତ ଭୟଙ୍କର ପରିସ୍ଥିତି ସୃଷ୍ଟିକରିଥିଲା। ତେବେ ସଂପ୍ରତି ଅଳ୍ପ କିଛିଦିନ ହେଲା କେତେକ ରାଜ୍ୟରେ ଦୈନିକ ସଂକ୍ରମିତଙ୍କ ସଂଖ୍ୟାରେ ହ୍ରାସ ପରିଲକ୍ଷିତ ହେବା ଆରମ୍ଭ କରିଛି। ମହାରାଷ୍ଟ୍ର, ଦିଲ୍ଲୀ ସମେତ ୧୮ଟି ରାଜ୍ୟରେ ଏବେ ନୂଆ ସଂକ୍ରମିତଙ୍କ ସଂଖ୍ୟା କମୁଛି। ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ତାଲାବନ୍ଦ, ତୁଣ୍ଡି ପିନ୍ଧିବା ଏବଂ ସାମାଜିକ ଦୂରତା ବଜାୟ ରଖିବା ଦ୍ୱାରା ଏହା ସମ୍ଭବ ହୋଇପାରିଛି। ଏହି ବ୍ୟବସ୍ଥା ବଳବତ୍ତର ରଖାଯିବା ସହିତ କରୋନା ସଂକ୍ରମଣ ଦେଖାଯାଉଥିବା ଅଞ୍ଚଳରେ କ୍ଷୁଦ୍ର ଆବଦ୍ଧାଞ୍ଚଳ କରିବାକୁ ମନ୍ତ୍ରଣାଳୟ ପକ୍ଷରୁ ଗୁରୁତ୍ୱ ଦିଆଯାଇଛି। ସଂକ୍ରମଣ ହ୍ରାସ ପାଉଥିବା ଅନ୍ୟାନ୍ୟ ରାଜ୍ୟଗୁଡିକ ମଧ୍ୟରେ ଉତ୍ତରପ୍ରଦେଶ, ରାଜସ୍ଥାନ, ଛତିଶଗଡ ଏବଂ ଗୁଜରାଟ ପ୍ରଭୃତି ରହିଛନ୍ତି। ସେହିଭଳି ଗତ ଦୁଇଦିନ ଧରି ଦେଶରେ ଦୈନିକ କୋଭିଡ ଜନିତ ମୃତ୍ୟୁସଂଖ୍ୟା ୪ହଜାର ତଳେ ରହୁଛି। ଦେଶର କେତେକ ଜିଲାରେ ନମୁନା ପରୀକ୍ଷା ବୃଦ୍ଧି ଘଟିଥିଲେ ମଧ୍ୟ ସେଠାରେ ସଂକ୍ରମିତ ଚିହ୍ନଟ ଘଟଣା କମିବାରେ ଲାଗିଛି। ଏପ୍ରିଲ ୨୯ରୁ ମଇ ମାସ ୫ ତାରିଖ ମଧ୍ୟରେ ୧୮୨ଟି ଜିଲାରେ ଏହି ସ୍ଥିତି ପରିଲକ୍ଷିତ ହୋଇଥିବା ଜଣାଯାଇଛି।

Comments
Loading...