ସଚେତନ ହେଉନାହାନ୍ତି: ଭାରତରେ ବଢୁଛି କରୋନା, ୨୪ ଘଣ୍ଟାରେ ୧୪୯ ନୂଆ ଆକ୍ରାନ୍ତ

ନୂଆଦିଲ୍ଲୀ: ଭାରତରେ ସଚେତନ ହେଉନାହାନ୍ତି ଲୋକେ। କରୋନା ଭୂତାଣୁ ବିରୋଧରେ ଲଢ଼େଇ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶକୁ ୨୧ ଦିନ ପାଇଁ ଲକ୍‌ଡାଉନ ଘୋଷଣା କରିଥିଲେ ହେଁ ଲୋକେ ନିୟମ ମାନୁନାହାନ୍ତି। ଫଳରେ ଦେଶରେ କରୋନା ବଢ଼ିବାରେ ଲାଗିଛି। ଗତ ୨୪ ଘଣ୍ଟା ମଧ୍ୟରେ ଦେଶରେ ୧୪୯ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି। ଶନିବାର ସକାଳ ୧୦ଟା ସୁଦ୍ଧା ଦେଶରେ ମୋଟ ଆକ୍ରାନ୍ତ ସଂଖ୍ୟା ୯୦୨ରେ ପହଞ୍ଚିଛି। ସେମାନଙ୍କ ମଧ୍ୟରୁ ୮୦୦ ଜଣ ଚିକିତ୍ସାଧୀନ ଥିବାବେଳେ ୮୩ ଜଣ ଆରୋଗ୍ୟ ହୋଇଛନ୍ତି। ଅନ୍ୟ ୧୯ ଜଣଙ୍କ ମୃତ୍ୟୁ ଘଟିଛି। ସରକାର ଲୋକଙ୍କୁ ଏକାଠି ନ ହେବା, ସାମାଜିକ ଦୂରତ୍ଵ ରକ୍ଷା କରିବାକୁ ବାରମ୍ବାର ନିବେଦନ କରୁଥିଲେ ମଧ୍ୟ ଜନସାଧାରଣ ତାହାକୁ ଖାତିର କରୁନାହାନ୍ତି। ବିଭିନ୍ନ ରାଜ୍ୟରେ ଲୋକେ ଏହି ନିୟମକୁ ଉଲ୍ଲଂଘନ କରୁଥିବା ଦେଖିବାକୁ ମିଳିଛି।

କେରଳରେ ସର୍ବାଧିକ ୧୭୬ ଜଣ ଆକ୍ରାନ୍ତ ହୋଇଥିବାବେଳେ ୧୨ ଜଣ ଆରୋଗ୍ୟ ହୋଇଛନ୍ତି। ସେହିପରି ମହାରାଷ୍ଟ୍ରରେ ୨ୟ ସର୍ବାଧିକ ଆକ୍ରାନ୍ତ ରହିଛନ୍ତି। ଏଠାରେ ମୋଟ ଆକ୍ରାନ୍ତ ସଂଖ୍ୟା ୧୬୨ ଥିବାବେଳେ ୧୩୩ ଜଣ ଚିକିତ୍ସାଧୀନ ଅଛନ୍ତି। ୨୫ ଜଣ ଆରୋଗ୍ୟ ହୋଇଥିବାବେଳେ ୪ ଜଣଙ୍କର ମୃତ୍ୟୁ ଘଟିଛି। ଏହାବ୍ୟତୀତ ଅଧିକ ଆକ୍ରାନ୍ତ ଚିହ୍ନଟ ହୋଇଥିବା ରାଜ୍ୟଗୁଡ଼ିକ ମଧ୍ୟରେ କର୍ଣ୍ଣାଟକ ୬୪, ତେଲେଙ୍ଗାନା ୫୯, ଗୁଜରାଟ ୫୩, ରାଜସ୍ଥାନ ୫୦, ଉତ୍ତରପ୍ରଦେଶ ୪୯, ଦିଲ୍ଲୀ ୪୦, ପଞ୍ଜାବ ଏବଂ ତାମିଲନାଡୁରେ ୩୮ ଜଣ ଲେଖାଏ ଆକ୍ରାନ୍ତ ଚିହ୍ନଟ ହୋଇଛନ୍ତି। ହରିୟାଣା, ମଧ୍ୟପ୍ରଦେଶରେ ୩୩ ଲେଖାଏ ଆକ୍ରାନ୍ତ ଠାବ ହୋଇଛନ୍ତି। ଶନିବାର ଗୁଜରାଟ ଏବଂ ମହାରାଷ୍ଟ୍ରରେ ୬ ଜଣ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି।

Comments
Loading...