ଗୁଳିକାଣ୍ଡରେ ସୁନା ଦୋକାନୀ ମୃତ ; ଜଣେ ଗୁରୁତର

ସୁନ୍ଦରଗଡ : ସୁନ୍ଦରଗଡ ଜିଲା ଅନ୍ତର୍ଗତ ବଡ ଗାଁରେ ଆଜି ସକାଳେ ଗୁଳିକାଣ୍ଡରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ମୃତକ ଜଣଙ୍କ ରୋହିତ ବର୍ମା (୨୨)। ସେ ମା ମଙ୍ଗଳା ଜୁଏଲାରୀର ମାଲିକ ବୋଲି ଜଣାପଡିଛି। ରୋହିତଙ୍କ ବାପା ଚନ୍ଦ୍ରଶେଖର ବର୍ମା ମଧ୍ୟ ସୁନା ବ୍ୟବସାୟ କରନ୍ତି। ଗୁରୁତର ବ୍ୟକ୍ତି ଜଣଙ୍କ ହେଲେ ସରୋଜ ଦାସ।ଗୁରୁତର ଅବସ୍ଥାରେ ରୋହିତଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଚିିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି। ସରୋଜଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ସୂଚନା ଯୋଗ୍ୟ ; ସରୋଜଙ୍କ ଘରେ ରୋହିତ ନିଜର ସୁନା ଦୋକାନ ଭଡା ଭାବେ ନେଇଥିଲେ। ଆଜି ସକାଳ ସମୟରେ ସରୋଜ ଓ ରୋହିତ ସୁନା ଗହଣା ଓ ଟଙ୍କା ବ୍ୟାଗ ନେଇ ଦୋକାନ ସମ୍ମୁଖରେ ଥିବା ବେଳେ ଗୋଟିଏ ବାଇକରେ ୩ ଦୁର୍ବୃତ୍ତ ଆସି ଗୁଳି ଚାଳନା ଆରମ୍ଭ କରିଥିଲେ। ପ୍ରଥମେ ରୋହିତ ମୁଣ୍ଡରେ ଓ ପେଟରେ ଗୁଳି ବାଜିବା ପରେ ଦୁର୍ବୃତ୍ତମାନେ ଟଙ୍କା ଓ ଗହଣା ବ୍ୟାଗ ଛଡାଇ ବାଇକରେ ଖସି ପଳାଇବାକୁ ଆରମ୍ଭ କରିଥିଲେ। ଉକ୍ତ ସମୟରେ ସରୋଜ ସେମାନଙ୍କୁ ବାଧା ଦେବାକୁ ଦୁର୍ବୃତ୍ତମାନେ ସରୋଜଙ୍କ ଉପରକୁ ମଧ୍ୟ ଗୁଳିଚାଳନା କରିଥିଲେ। ସରୋଜଙ୍କ ଅଣ୍ଟାରେ ଗୁଳି ବାଜିବାରୁ ସେ ମଧ୍ୟ ତଳେ ପଡି ଯାଇଥିଲେ। ମାତ୍ର ୩ ଦୁର୍ବୃତ୍ତଙ୍କ ମଧ୍ୟରୁ ଜଣେ ବାଇକରେ ଯାଇନପାରି ସମ୍ପୃକ୍ତ ଅଞ୍ଚଳରେ ଲୁଚି ରହିଛି ବୋଲି ସନ୍ଦେହ କରାଯାଉଛି। ଅନ୍ୟ ଦୁର୍ବୃତ୍ତମାନେ ଟଙ୍କା ବ୍ୟାଗ ଓ ସୁନା ନେଇ ଖସି ପଳାଇଛନ୍ତି। ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।ଘଟଣାସ୍ଥଳରୁ ୨ ରାଉଣ୍ଡ ଗୁଳି ଓ ପିସ୍ତଲ ଜବତ ହୋଇଛି। ଉକ୍ତ ଗୁଳିକାଣ୍ଡ ସହ ରାଉରକେଲାରେ ପ୍ରାୟ ୨ ମାସ ତଳେ ହୋଇଥିବା ସୁନା ଦୋକାନୀ ହତ୍ୟା ଓ ଗୁଳିକାଣ୍ଡରେ ଏହି ଦୁର୍ବୃତ୍ତ ମାନଙ୍କ ସମ୍ପୃକ୍ତ ଥିବା ନେଇ ଆଶଙ୍କା କରାଯାଉଛି।

Comments
Loading...