ବେଗୁନିଆ : ବେଗୁନିଆ ପୋଲିସ ପେଟ୍ରୋଲିଂ କରୁଥିବା ସମୟରେ ସୋମବାର ବିଳମ୍ବିତ ରାତ୍ରରେ ଏହି ଥାନା ଅନ୍ତର୍ଗତ ଚଟୁଆଠାରୁ ୨୦ଟି ଗୋରୁ ବୋଝେଇ କରି ଯାଉଥିବା ଏକ ଟ୍ରକକୁ ଜବତ କରିଛି । ଗାଡି ଡ୍ରାଇଭରକୁ ଗିରଫ କରି କୋର୍ଟ ଚାଲାଣ କରିଛି । ବେଗୁନିଆ ଥାନା ଅଂଚଳରେ ଲକଡ଼ାଉନ ଏବଂ ସଟଡାଉନରେ ଗୋରୁ ବେପାରିମାନେ ସକ୍ରିୟ ରହି ରାତି ଅଧିଆ ଗୋଚାଲାଣ କରୁଛନ୍ତି । ଗତକାଲି ବିଳମ୍ବିତ ରାତିରେ ବୋଲଗଡ଼ ବ୍ଲକ ବେଗୁନିଆ ଥାନା ଅନ୍ତର୍ଗତ କଡବ ଗ୍ରାମରୁ ଏକ ଆଇଚର ଟ୍ରକରେ ୨୦ ଟି ଗୋରୁ ଅତି ଦୟନୀୟ ଅବସ୍ଥାରେ ବୋଝେଇ କରି ଧରପଡିବା ଭୟରେ ବେଗୁନିଆ ଦେଇ ନଯାଇ ପରିଚ୍ଛଳ ଦେଇ ଖୋର୍ଦ୍ଧା ଅଭିମୁଖେ ଯିବାପାଇଁ ବାହାରିଥିବା ଟ୍ରକଟିକୁ ପେଟ୍ରୋଲିଂ ସମୟରେ ଚଟୁଆଠାରେ ଥାନା ଏସଆଇ ଶ୍ରୀକାନ୍ତ କୁମାର ପଣ୍ଡା, ଏଏସଆଇ ପୀତବାସ ମହାନ୍ତି ଏବଂ ଥାନା କର୍ମଚାରୀମାନେ ଜବତ କରି ଥାନାକୁ ଆଣିଥିଲେ । ଖଣ୍ଡଗିରି ଥାନା ଅନ୍ତର୍ଗତ ଡୁମଡୁମା ରଘୁନାଥପୁର ଗ୍ରାମର ଡ୍ରାଇଭର ବାବୁଲା ଲେଙ୍କାକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି ।ପୋଲିସ ଗୋରୁଗୁଡିକ ଭୁବନେଶ୍ୱରସ୍ଥିତ ସିଜୁଆ ଗୋଶାଳା ଜିମା ଦେଇଛି । ଗୋଚାଲାଣ ଅଭିଯୋଗରେ ପୋଲିସ ଥାନାରେ ୧୧୪/୨୧ ନଂ ମାମଲା ରୁଜୁ କରି ଘଟଣାର ତଦନ୍ତ ଚାଲୁ ରଖିଛି ।
Comments are closed.