ଲୋକାୟୁକ୍ତ ନିଯୁକ୍ତି ମାମଲା: ମୁଖ୍ୟ ସଚିବଙ୍କୁ ବ୍ୟକ୍ତିଗତ ହାଜିରା ନିର୍ଦେଶ

0

ନୂଆଦିଲ୍ଲୀ: ଓଡ଼ିଶାରେ ଲୋକାୟୁକ୍ତ ନିଯୁକ୍ତିରେ ବିଳମ୍ବ ନେଇ କ୍ଷୁବ୍ଧ ସୁପ୍ରିମକୋର୍ଟ ରାଜ୍ୟ ମୁଖ୍ୟ ସଚିବଙ୍କୁ ବ୍ୟକ୍ତିଗତ ହାଜରା ନିର୍ଦେଶ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୨୯ରେ ମୁଖ୍ୟ ସଚିବ ସର୍ବୋଚ୍ଚ ନ୍ୟାୟାଳୟରେ ହାଜର ହୋଇ ଓଡ଼ିଶାରେ ଲୋକାୟୁକ୍ତ ନିଯୁକ୍ତି ପ୍ରକ୍ରିୟାର ସବିଶେଷ ତଥ୍ୟ ରଖିବେ। ଏଣିକି ରାଜ୍ୟ ସରକାର ଓକିଲଙ୍କ ଠାରୁ ନୁହେଁ ଏହି ପ୍ରସଙ୍ଗରେ ସର୍ବୋଚ୍ଚ ନ୍ୟାୟାଳୟ ରାଜ୍ୟ ସରକାରଙ୍କଠାରୁ ସିଧାସଳଖ ସମସ୍ତ ତଥ୍ୟ ଜାଣିବାକୁ ଚାହିଁବେ ବୋଲି ଆଜି ଶୁଣାଣି ବେଳେ ପ୍ରଧାନ ବିଚାରପତି ରଞ୍ଜନ ଗୋଗେଇଙ୍କ ଅଧ୍ୟକ୍ଷତାରେ ଗଠିତ ତିନି ଜଣିଆ ଖଣ୍ଡପୀଠ ସ୍ପଷ୍ଟ କରିଥିଲେ।
ଲୋକାୟୁକ୍ତ ନିଯୁକ୍ତି ପ୍ରସଙ୍ଗରେ ପ୍ରତ୍ୟେକ ପ୍ରକ୍ରିୟା ସଂପୂର୍ଣ୍ଣ କରିବା ପାଇଁ ଧାର୍ଯ୍ୟ ସମୟସୀମାକୁ ତାରିଖ ଅନୁଯାୟୀ ରାଜ୍ୟ ମୁଖ୍ୟ ସଚିବ କୋର୍ଟଙ୍କୁ ଜଣାଇବେ। ମୁଖ୍ୟ ସଚିବଙ୍କ ଉପସ୍ଥିତି ପରେ ଓଡ଼ିଶାରେ ଲୋକାୟୁକ୍ତ ନିଯୁକ୍ତି ନେଇ ସ୍ପଷ୍ଟ ଚିତ୍ର ମିଳିବ ବୋଲି ପ୍ରଧାନ ବିଚାରପତିଙ୍କ ଖଣ୍ଡପୀଠ ଟିପ୍ପଣୀ କରିଛନ୍ତି। ମାମଲାର ଶୁଣାଣି ବେଳେ ରାଜ୍ୟ ସରକାରଙ୍କ ଓକିଲ ଶିବାଶିଷ ମିଶ୍ର ଦର୍ଶାଇଥିଲେ ଯେ ଓଡ଼ିଶାରେ ଲୋକାୟୁକ୍ତ ନିଯୁକ୍ତି ପାଇଁ ରୁଲସ ବିଜ୍ଞପ୍ତି ସରିଛି। ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ମନୋନୟନ କମିଟି ଗଠନ ମଧ୍ୟ ସରିଛି। ମନୋନୟନ କମିଟିର ପଞ୍ଚମ ସଦସ୍ୟ ଭାବେ ସୁପ୍ରିମକୋର୍ଟର ଅବସରପ୍ରାପ୍ତ ବିଚାରପତି ଅନଙ୍ଗ ପଟ୍ଟନାୟକଙ୍କୁ ମନୋନୀତ କରାଯାଇଛି।
ଖୁବ୍‍ଶୀଘ୍ର ସର୍ଚ୍ଚ କମିଟି ଗଠନ କରାଯାଇ ନିଯୁକ୍ତି ପ୍ରକ୍ରିୟାକୁ ତ୍ୱରାନ୍ୱିତ କରାଯିବ ବୋଲି ସର୍ବୋଚ୍ଚ ନ୍ୟାୟାଳୟଙ୍କୁ ଆଡଭୋକେଟ ମିଶ୍ର ଅବଗତ କରାଇଥିଲେ। ରାଜ୍ୟରେ ଲୋକାୟୁକ୍ତ ନିଯୁକ୍ତି ପ୍ରକ୍ରିୟା ଶେଷ କରିବା ପାଇଁ ଅଧିକ ତିନି ମାସ ମହଲତ ଲୋଡ଼ିଥିଲେ।

Leave A Reply