ବଲିଉଡର ଅନ୍ୟତମ ଚର୍ଚ୍ଚିତ ଲୋକପ୍ରିୟ ଯୋଡ଼ି ଭାବେ ଶାହରୁଖ୍ ଖାନ-କାଜଲ ଜଣାଯାନ୍ତି। ‘ଅନ୍-ସ୍କ୍ରିନ୍ କପଲ୍’ ଭାବେ ଏ ଦୁଇ ତାରକାଙ୍କୁ ୭୭%ରୁ ଅଧିକ ଦର୍ଶକ ପସନ୍ଦ କରିଥିବାର ସର୍ବେକ୍ଷଣରୁ ପ୍ରକାଶ। ‘ଦିଲୱାଲେ ଦୁଲହନିୟା ଲେ ଜାଏଙ୍ଗେ’, ‘କୁଛ୍ କୁଛ୍ ହୋତା ହୈ’, ‘ବାଜିଗର’, ‘ମାଇଁ ନେମ୍ ଇଜ୍ ଖାନ୍’, ‘କଭି ଖୁସି କଭି ଗମ୍’ ଆଦି ଚଳଚ୍ଚିତ୍ରରେ ଦୁହେଁ ସାଥି ହୋଇ କାମ କରିଛନ୍ତି। ଦୁହେଁ ଶେଷ ଥର ଏକତ୍ର ‘ଦିଲୱାଲେ’ରେ କାମ କରିଥିଲେ। ଯଦିଓ ଚଳଚ୍ଚିତ୍ରଟି ବକ୍ସ ଅଫିସ୍ରେ ସଫଳତା ପାଇନଥିଲା, କିନ୍ତୁ ଏଇ ଯୋଡ଼ିକୁ ପସନ୍ଦ କରାଯାଇଥିଲା। ମିଳିଥିବା ଖବର ଅନୁସାରେ, ଦୁହେଁ ପୁନଃ ଏକତ୍ର କାମ କରିବାକୁ ଯାଉଛନ୍ତି। ସୁପରହିଟ୍ ଚଳଚ୍ଚିତ୍ର ‘ହିନ୍ଦୀ ମିଡିୟମ୍’ର ଦ୍ବିତୀୟ ଭାଗରେ ଶାହରୁଖ୍-କାଜଲ୍ କାମ କରିପାରନ୍ତି। ପ୍ରଥମ ଭାଗରେ ଇରଫାନ୍ ଖାନ୍ଙ୍କ ଜବରଦସ୍ତ ଅଭିନୟକୁ ବିଭିନ୍ନ ମହଲରେ ପ୍ରଶଂସା କରାଯାଇଥିଲା। ଦ୍ବିତୀୟ ଭାଗରେ ମଧ୍ୟ ଇରଫାନ୍ ଦେଖାଦେବେ। ଆମେରିକାରେ ଏହି ଚଳଚ୍ଚିତ୍ର ସୁଟିଂ ହେବ। ଚଳଚ୍ଚିତ୍ରର ପ୍ରଯୋଜକ ଦିନେଶ ଭିଜନ୍ ଏହା ସ୍ପଷ୍ଟ କରିଛନ୍ତି। ହୋମି ଅଦଜାନିୟା ଦ୍ବିତୀୟ ଭାଗର ନିର୍ଦେଶନା ଦେବା ସହ ଶାହରୁଖ୍-କାଜଲ ଦୁହେଁ କାହାଣୀ ଶୁଣି ସବୁଜ ସଙ୍କେତ ଦେଇସାରିଛନ୍ତି।
