ୱାଶିଂଟନ୍: ଆମେରିକାର ପିଟ୍ସବର୍ଗ ସହରରେ ଏକ ପ୍ରାର୍ଥନା ସଭାରେ ଜଣେ ଆତତାୟୀ ଆଖିବୁଜା ଗୁଳି ଚଳାଇଛି। ଏଥିରେ ୧୧ ଜଣଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଗୁରୁତର ଅଛନ୍ତି।
ପୁଲିସ ସୂଚନା ଅନୁଯାୟୀ ଜଣେ ନବଜାତକ ନାମକରଣ ଉତ୍ସବ ପାଇଁ ଇହୁଦୀ ଧର୍ମର ଏକ ପରିବାର ଓ ବନ୍ଧୁବର୍ଗ ଏକାଠୀ ହୋଇଥିଲେ। ସେମାନେ ପ୍ରଭୁଙ୍କ ଉଦେଶ୍ୟରେ ପ୍ରାର୍ଥନା କରିବା ବେଳେ ଜଣେ ବ୍ୟକ୍ତି ସେଠାରେ ଆଖିବୁଜା ଗୁଳି ଚଳାଇଥିଲା। ଆମେରିକାର ବିଚାର ବିଭାଗୀୟ ଆଇନ ଅନୁଯାୟୀ ଆତତାୟୀକୁ ମୃତ୍ୟୁ ଦଣ୍ଡ ଦିଆଯିବ। ଏହି ଘଟଣାକୁ ଆମେରିକା ସମେତ ବିଶ୍ୱର ବହୁ ନେତା ଓ ଅଧିକାରୀ ନିନ୍ଦା କରିଛନ୍ତି। ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଘଟଣାର ନିନ୍ଦା କରିବା ସହିତ ଆମେରିକାରେ ଧର୍ମୀୟ ଭାବନାରେ ହିଂସାର ସ୍ଥାନ ନାହିଁ ବୋଲି କହିଛନ୍ତି। ଆଗାମୀ ନିର୍ବାଚନ ପୂର୍ବରୁ କିଛି ନ୍ୟସ୍ତ ସ୍ୱାର୍ଥ ବ୍ୟକ୍ତି ଏଭଳି ହିଂସାକାଣ୍ଡ ଭିଆଉଥିବା ସେ କହିଛନ୍ତି। ଆମେରିକାର ଘଟିଥିବା ନାରକୀୟ ହିଂସାକାଣ୍ଡ ମଧ୍ୟରୁ ଏହା ଅନ୍ୟତମ। ଇସ୍ରାଏଲ୍ ରାଷ୍ଟ୍ରପତି ନେତାନ୍ୟାହୁ ମୃତ ଇହୁଦୀ ପରିବାର ପ୍ରତି ସମବେଦନା ଜ୍ଞାପନ କରିଛନ୍ତି।
