ନୂଆଦିଲ୍ଳୀ: ଚଳିତ ବର୍ଷର ଜ୍ଞାନପୀଠ ସମ୍ମାନ ପାଇଁ ବିଶିଷ୍ଟ ଲେଖକ ଅମିତାଭ ଘୋଷ ମନୋନୀତ ହୋଇଛନ୍ତି। ଭାରତର ସାହିତ୍ୟ କୃତି କ୍ଷେତ୍ରରେ ଏହି ସର୍ବୋଚ୍ଚ ସମ୍ମାନ ୧୯୬୧ ରୁ ଦିଆଯାଉଛି।
୧୯୫୬ରେ କଲିକତାରେ ଜନ୍ମିତ ଅମିତାଭଙ୍କ ଶୈଶବ ବାଂଲାଦେଶ ଓ ଶ୍ରୀଲଙ୍କାରେ କଟିଥିଲା। ଦିଲ୍ଳୀ ଓ ଅକ୍ସଫୋର୍ଡ ବିଶ୍ୱ ବିଦ୍ୟାଳୟରୁ ଡିଗ୍ରୀ ହାସଲ କରିଥିବା ଅମିତାଭ ଏବେ ନ୍ୟୁୟର୍କରେ ରହୁଛନ୍ତି। ଉପନ୍ୟାସ ‘ଶ୍ୟାଡୋ ଲାଇନ୍ସ ଆଣ୍ଡ ସର୍କଲ୍ ଅଫ୍ ରିଜନ୍’, ‘ଇନ୍ ଆନ୍ ଆଣ୍ଟିକ୍ ଲ୍ୟାଣ୍ଡ ଡିଫାଇ ଜେନର’, ‘ଦ ଗ୍ରେଟ୍ ଡିଆରେଞ୍ଜମେଣ୍ଟ’, ‘ସି ଅଫ୍ ପପିସ୍’, ‘ରିଭର ଅଫ୍ ସ୍ମୋକ୍’, ‘ଫ୍ଲଡ୍ ଅଫ୍ ଫାୟାର’ ଆଦି ତାଙ୍କର ବହୁ ଚର୍ଚ୍ଚିତ ସାହିତ୍ୟ କୃତି ମଧ୍ୟରୁ ଅନ୍ୟତମ। ଅମିତାଭଙ୍କ ସାହିତ୍ୟ ସୃଷ୍ଟି ସାଧାରଣତଃ ଇତିହାସର ଆଧାର ଉପରେ ରଚିତ। ଇତିହାସକୁ ନିଜସ୍ୱ ଦୃଷ୍ଟିଭଙ୍ଗୀରେ ବିଶ୍ଲେଷଣ ଓ ତର୍ଜମା କରି ଆଧୁନିକ ସମାଜ ଆଗରେ ଉପସ୍ଥାପନ କରିବାରେ ତାଙ୍କର ଚାତୁରୀ ଅନନ୍ୟ।
ସାହିତ୍ୟ କ୍ଷେତ୍ରକୁ ଅବଦାନ ପାଇଁ ସେ କେନ୍ଦ୍ରୀୟ ସାହିତ୍ୟ ଏକାଡେମୀ ଓ ପଦ୍ମଶ୍ରୀ ସମ୍ମାନରେ ସମ୍ମାନିତ ହୋଇଛନ୍ତି। ଜ୍ଞାନପୀଠ ସମ୍ମାନ ପାଇଁ ଯୋଗ୍ୟ ବିବେଚିତ ହୋଇଥିବାରୁ ଅମିତାଭ କୃତଜ୍ଞତା ପ୍ରକାଶ କରିଛନ୍ତି।
