୯୯.୩% ଅଚଳ ନୋଟ୍‍ ବ୍ୟାଙ୍କକୁ ଫେରିଛି: ଆରବିଆଇ

0

ମୁମ୍ବଇ: ବିମୁଦ୍ରାକରଣ ଘୋଷଣା ପରେ ଅଚଳ ହୋଇଯାଇଥିବା ୫୦୦ ଓ ୧୦୦୦ ଟଙ୍କିଆ ନୋଟ୍‍ ମଧ୍ୟରୁ ପ୍ରାୟ ୯୯.୩% ଆରବିଆଇ ପାଖକୁ ଫେରି ଆସିଛି। ବୁଧବାର ପ୍ରକାଶିତ ରିଜର୍ଭ ବ୍ୟାଙ୍କ ଅଫ୍‍ ଇଣ୍ଡିଆର ବାର୍ଷିକ ରିପୋର୍ଟରେ ଏ ସମ୍ପର୍କରେ ଉଲ୍ଳେଖ ରହିଛି।
୨୦୧୬, ନଭେମ୍ବର ୮ତାରିଖରେ କେନ୍ଦ୍ର ସରକାର ୫୦୦ ଓ ୧୦୦୦ ଟଙ୍କିଆ ନୋଟ୍‍କୁ ଅଚଳ ଘୋଷଣା କରିଥିଲେ। ଦେଶରୁ କଳାଟଙ୍କା ବିଲୋପ ପାଇଁ ଏହି ପଦକ୍ଷେପ ନିଆଯାଇଛି ବୋଲି କେନ୍ଦ୍ର ସରକାରଙ୍କ ପକ୍ଷରୁ ସେତେବେଳେ କୁହାଯାଇଥିଲା। କିନ୍ତୁ କଳାଟଙ୍କା ମହଜୁଦକାରୀମାନେ ବିଭିନ୍ନ ଉପାୟରେ ସେମାନଙ୍କ ପାଖରେ ଥିବା କଳାଟଙ୍କା ବ୍ୟାଙ୍କରେ ଜମା କରି ସେଗୁଡ଼ିକୁ ବୈଧ କରିଦେଇଥିଲେ। ସେତେବେଳେ ବଜାରରେ ପ୍ରଚଳିତ ୫୦୦ ଓ ୧୦୦୦ ଟଙ୍କିଆ ନୋଟ୍‍ ମଧ୍ୟରୁ ୯୯% ବିଭିନ୍ନ ବ୍ୟାଙ୍କ ଜରିଆରେ ଆରବିଆଇ ପାଖକୁ ଫେରି ଆସିଥିବା ଅଭିଯୋଗ ହୋଇଥିଲା। କେନ୍ଦ୍ର ସରକାର ଏହି ଅଭିଯୋଗକୁ ଅସ୍ୱୀକାର କରି ଆସୁଥିଲେ। କିନ୍ତୁ ଏବେ ଆରବିଆଇର ରିପୋର୍ଟ କେନ୍ଦ୍ର ସରକାରଙ୍କୁ ଅଡ଼ୁଆରେ ପକାଇଛି।
ଆରବିଆଇ ରିପୋର୍ଟରେ ଉଲ୍ଲେଖିତ ତଥ୍ୟାନୁଯାୟୀ, ୨୦୧୬ ନଭେମ୍ବର ୧୫ ତାରିଖରେ ବଜାରରେ ମୋଟ ୧୫,୪୧୭.୯୩ ଲକ୍ଷ କୋଟି ଟଙ୍କାର ୫୦୦ ଓ ୧୦୦୦ ଟଙ୍କିଆ ନୋଟ୍‍ ପ୍ରଚଳନ ଥିବା ବେଳେ ମୋଟ ୧୫,୩୧୦.୭୩ ଲକ୍ଷ କୋଟି ଟଙ୍କାର ନୋଟ୍‍ ଫେରି ଆସିଥିଲା। ସେହିପରି ବିମୁଦ୍ରାକରଣ ପରେ ଅଧିକ ସଂଖ୍ୟାରେ ୫୦୦ ଟଙ୍କିଆ ନୋଟ୍‍ ବଜାରକୁ ଛାଡ଼ିବାକୁ ପଡ଼ିବାରୁ ନୋଟ ମୁଦ୍ରଣ ଖର୍ଚ୍ଚ ମଧ୍ୟ ବୃଦ୍ଧି ପାଇଥିଲା। ବିମୁଦ୍ରାକରଣ ପରେ ଆରବିଆଇ ନୋଟ୍‍ ମୁଦ୍ରଣ ପାଇଁ ସେହି ଆର୍ଥିକ ବର୍ଷରେ ୭,୯୬୫ କୋଟି ଟଙ୍କା ଖର୍ଚ୍ଚ କରିଛି। ପୂର୍ବ ଆର୍ଥିକ ବର୍ଷରେ ନୋଟ୍‍ ଖର୍ଚ୍ଚ ଥିଲା ୩,୪୨୧ କୋଟି ଟଙ୍କା। ସେହିପରି ୨୦୧୭ ଜୁଲାଇରୁ ୨୦୧୮ ଜୁନ୍‍ ମଧ୍ୟରେ ନୋଟ୍‍ ମୁଦ୍ରଣ ପାଇଁ ଆରବିଆଇ ଆଉ ୪, ୯୧୨ କୋଟି ଟଙ୍କା ଖର୍ଚ୍ଚ କରିଥିଲା।

Comments
Loading...