ରାଜ୍ୟ ବଧିର ଚେସ୍‍: ସୁଶାନ୍ତ ଓ ପ୍ରତିମା ଚମ୍ପିଆନ

0

ଭୁବନେଶ୍ୱର: ରାଜ୍ୟ ବଧିର କ୍ରୀଡ଼ା ପରିଷଦ ଆନୁକୂଲ୍ୟରେ ପଲାସପଲ୍ଲିସ୍ଥିତ ଓଡିଏ ପରିସରରେ ୨୧ତମ ରାଜ୍ୟ ବଧିର ଚେସ ପ୍ରତିଯୋଗିତା ରବିବାର ଉଦ୍‍ଯାପିତ ହୋଇଯାଇଛି। ସିନିୟର ପୁରୁଷବର୍ଗରେ ସୁଶାନ୍ତ କୁମାର ସାହୁ ଚମ୍ପିଆନ, ବାବୁଲା କୁମାର ଜତୀ ରନର୍ସଅପ, ସଞ୍ଜୟ ମହାପାତ୍ର ୩ୟ; ମହିଳାରେ ପ୍ରତିମା ଦଳାଇ ଚମ୍ପିଆନ, ମମତା ପ୍ରହରାଜ ରନର୍ସଅପ ଓ ଦେବଯାନୀ ସାହୁ ୩ୟ, ଜୁନିୟର ବାଳକ ବର୍ଗରେ ବିପିନ ବିହାରୀ ସାହୁ ଚମ୍ପିଆନ, ରିଙ୍କୁ ସାହୁ ରନର୍ସଅପ ଓ ଦୀପକ ପ୍ରଧାନ ୩ୟ, ବାଳିକାରେ ସୁଭଦ୍ରା କିସ୍‍କୋ ଚମ୍ପିଆନ, ପ୍ରୀତିଲତା ବେହେରା ରନର୍ସଅପ ହୋଇଛନ୍ତି। ଦଳଗତ ବିଭାଗରେ ଖୋର୍ଦ୍ଧା ଚମ୍ପିଆନ ଓ କଟକ ରନର୍ସଅପ ଆଖ୍ୟା ଅର୍ଜନ କରିଛନ୍ତି।
ଓଡ଼ିଶା ବଧିର କ୍ରୀଡ଼ା ପରିଷଦ ସଭାପତି ତଥା ଅନ୍ତର୍ଜାତୀୟ ଭିନ୍ନକ୍ଷମ ବ୍ୟାଡ୍‍ମିଣ୍ଟନ ଖେଳାଳି ଅସିତ୍‍ ମିଶ୍ରଙ୍କ ସଭାପତିତ୍ୱରେ ପୁରସ୍କାର ବିତରଣୀ ଉତ୍ସବରେ ସାମାଜିକ ସୁରକ୍ଷା ସଶକ୍ତିକରଣ ଓ ଭିନ୍ନକ୍ଷମ ବିଭାଗର ନିର୍ଦେଶକ ସୁଶାନ୍ତ ମହାପାତ୍ର କୃତୀ ଖେଳାଳିଙ୍କୁ ଟ୍ରଫି ପ୍ରଦାନ କରିଥିଲେ। ଓଡ଼ିଶା ଉଚ୍ଚ ନ୍ୟାୟାଳୟର ବରିଷ୍ଠ ଆଇନଜୀବୀ ନିଶିଥ କୁମାର ମହାନ୍ତି, ଚେସ୍‍ ପ୍ରଶିକ୍ଷକ ସତ୍ୟରଞ୍ଜନ ପଟ୍ଟନାୟକ, ପ୍ରତିଷ୍ଠାତା ସଦସ୍ୟ ବିଜୟ କୁମାର ପରିଡ଼ା ଉପସ୍ଥିତ ଥିଲେ। ପ୍ରତିଯୋଗିତାରେ ୧୦ଟି ଜିଲାରୁ ୪୦ ଜଣ ଅଂଶଗ୍ରହଣ କରିଥିଲେ। ଏଥିରୁ ଶ୍ରେଷ୍ଠ ୧୫ଜଣ ଖେଳାଳି ଡିସେମ୍ବର ୧ରୁ ୫ ପର୍ଯ୍ୟନ୍ତ ରାଜସ୍ଥାନର ଜୟପୁରରେ ଅନୁଷ୍ଠିତ ହେବାକୁ ଥିବା ୨୧ତମ ଜାତୀୟ ବଧିର ଚେସ ପ୍ରତିଯୋଗିତା ଭାଗନେବେ ବୋଲି ଆୟୋଜକ ସମ୍ପାଦକ ନିରଞ୍ଜନ ଯୋଶୀ ସୂଚନା ଦେଇଛନ୍ତି।

Comments
Loading...