ମନ୍ଦିର ଖାଦ୍ୟ ଖାଇ ୧୨ ମୃତ, ୮୦ ଅସୁସ୍ଥ

0

ମହୀଶୂର: ମନ୍ଦିରରେ ରନ୍ଧା ଯାଇଥିବା ଖାଦ୍ୟ ଖାଇ ୧୨ ଜଣଙ୍କ ମୃତ୍ୟୁ ଘଟିଥିବା ବେଳେ ୮୦ ଜଣ ଅସୁସ୍ଥ ହୋଇଛନ୍ତି। ମୃତକଙ୍କ ମଧ୍ୟରେ ଜଣେ ୧୫ ବର୍ଷର କନ୍ୟା ଥିବା ଜଣାପଡ଼ିଛି। ଘଟଣା ଘଟିଛି କର୍ଣ୍ଣାଟକର ହାନୁର ଅଞ୍ଚଳରେ।
ସେଠାକାର ସୁଲଭାଡି କିଛୁଗୁଟ୍ଟି ମାରାମ୍ମା ମନ୍ଦିରରେ ଏକ ସମାରୋହ ପାଇଁ ଭୋଜିର ଆୟୋଜନ କରାଯାଇଥିଲା। ଖାଇବା ସାରିବା ପରେ ଲୋକମାନଙ୍କ ଉଦର ଯନ୍ତ୍ରଣା ସହିତ ବାନ୍ତି ହୋଇଥିଲା। ସେମାନଙ୍କୁ ସ୍ଥାନୀୟ ଅଞ୍ଚଳର ବିଭିନ୍ନ ଡାକ୍ତରଖାନାରେ ଭର୍ତ୍ତି କରାଯାଇଛି। ୧୨ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୧୨ ଜଣଙ୍କ ଅବସ୍ଥା ସଂକଟାପନ୍ନ ରହିଛି। ପ୍ରସାଦରେ କୌଣସି ବିଷାକ୍ତ ପଦାର୍ଥ ମିଶିଯାଇଥାଇପାରେ ବୋଲି ଖାଦ୍ୟ ନିରୀକ୍ଷକ କହିଛନ୍ତି। ଖାଦ୍ୟ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ଲାବ୍‍କୁ ପଠାଯାଇଛି। ଏହି ଘଟଣାରେ ଦୁଇ ଜଣଙ୍କୁ ଅଟକ ରଖାଯାଇଛି।
ଅସୁସ୍ଥ ଥିବା ଭକ୍ତଙ୍କ ସୂଚନା ଅନୁଯାୟୀ ପ୍ରସାଦରୁ କିରାସିନି ଗନ୍ଧ ଆସୁଥିଲା। ତଥାପି ତାହାକୁ ଅଣଦେଖା କରି ସେମାନେ ଖାଦ୍ୟ ଖାଇଥିଲେ। ଏହି ଘଟଣାରେ କର୍ଣ୍ଣାଟକ ମୁଖ୍ୟମନ୍ତ୍ରୀ ଏଚ୍‍ ଡି କୁମାରସ୍ୱାମୀ ଦୁଃଖପ୍ରକାଶ କରିବା ସହିତ ଆହତଙ୍କ ଚିକିତ୍ସାରେ ଯେପରି ହେଳା ନ ହୁଏ ସେଥିପ୍ରତି ଦୃଷ୍ଟି ଦେବାକୁ ପ୍ରଶାସନକୁ ନିର୍ଦେଶ ଦେଇଛନ୍ତି। ମୃତକଙ୍କ ପରିବାର ବର୍ଗକୁ ୫ ଲକ୍ଷ ଟଙ୍କା ଲେଖାଏଁ ସମବେଦନା ରାଶି ପ୍ରଦାନ କରାଯାଇଛି।

Comments
Loading...