ନୂଆବର୍ଷରେ ଭାରତୀୟ ଫୁଟ୍‌ବଲ ଦଳର ନୂଆ ଜର୍ସି

0

ନୂଆଦିଲ୍ଲୀ : ୨୦୧୯ରୁ ଭାରତୀୟ ପୁରୁଷ ଫୁଟ୍‌ବଲ ଦଳ ନୂଆ ଜର୍ସି ପିନ୍ଧି ପଡ଼ିଆକୁ ଓହ୍ଲାଇବ। ନୂଆବର୍ଷରେ ଭାରତୀୟ ଫୁଟ୍‌ବଲ ଦଳର ପ୍ରଥମ ଟୁର୍ଣ୍ଣାମେଣ୍ଟ ହେଉଛି ଏଏଫ୍‌ସି ଏସିଆନ୍ କପ୍। ଏହି ଟୁର୍ଣ୍ଣାମେଣ୍ଟ ୟୁଏଇରେ ଜାନୁୟାରୀ ୫ରୁ ଫେବୃୟାରୀ ୧ ପର୍ଯ୍ୟନ୍ତ ଖେଳାଯିବ। ଏହି ଟୁର୍ଣ୍ଣାମେଣ୍ଟରେ ନୂତନ ଜର୍ସି ପିନ୍ଧି ଭାରତୀୟ ଦଳ ଖେଳିବ। ବୁଧବାର ନୂଆଦିଲ୍ଲୀରେ ଭାରତୀୟ ଫୁଟ୍‌ବଲ ଦଳର ନୂତନ ଜର୍ସି ଉନ୍ମୋଚନ ହୋଇଯାଇଛି। ଏହି ଉତ୍ସବରେ ଭାରତୀୟ ଦଳର ୭ ଜଣ ଖେଳାଳି ନୂଆ ଜର୍ସି ପିନ୍ଧି ରାମ୍ପ୍‌ରେ ଚାଲିଥିଲେ। ଏହି ୭ ଜଣ ଖେଳାଳି ହେଲେ ଅଧିନାୟକ ସୁନୀଲ ଛେତ୍ରୀ, ଗୋଲ୍‌ରକ୍ଷକ ଗୁରପ୍ରୀତ ସିଂହ ସାନ୍ଧୁ, ସନ୍ଦେଶ ଝିଙ୍ଗାନ୍, ଜେଜେ ଲାଲପେଖ୍‌ଲୁଆ, ରାଓଲିନ୍ ବୋର୍ଜେସ୍, ଶୁଭାଶିଷ ବୋଷ ଓ ପ୍ରୀତମ କୋଟାଲ। ଭାରତୀୟ ଫୁଟ୍‌ବଲ ଦଳର ପୋଷାକ ପ୍ରାୟୋଜକ ହେଉଛି ‘ସିକ୍ସ୫ସିକ୍ସ’। ଏହି କମ୍ପାନୀ ସର୍ବଭାରତୀୟ ଫୁଟ୍‌ବଲ ମହାସଂଘ (ଏଆଇଏଫ୍‌ଏଫ୍) ସହ ୫ ବର୍ଷର ଚୁକ୍ତିକରିଛି। କେବଳ ଭାରତୀୟ ସିନିୟର ଦଳ ନୁହେଁ; ଭାରତର ସମସ୍ତ ବର୍ଗର ପୁରୁଷ ଓ ମହିଳା ଦଳର ପୋଷାକ ପ୍ରାୟୋଜକ ହୋଇଛି ‘ସିକ୍ସ୫ସିକ୍ସ’। ପୂର୍ବରୁ ନାଇକି ଭାରତୀୟ ଫୁଟ୍‌ବଲ ଦଳର ପୋଷାକ ପ୍ରାୟୋଜକ ଥିଲା; ଯାହା ସହ ଏଆଇଏଫ୍‌ଏଫ୍‌ର ଚୁକ୍ତି ଗତବର୍ଷ ସରିଯାଇଛି। ଚଳିତ ଇଣ୍ଡିଆନ୍ ସୁପର ଲିଗ୍ (ଆଇଏସ୍‌ଏଲ୍‌)ରେ କେରଳ ବ୍ଲାଷ୍ଟର୍ସ ଓ ଏଫ୍‌ସି ପୁଣେ ସିଟିର ପ୍ରାୟୋଜକ ହୋଇଛି ‘ସିକ୍ସ୫ସିକ୍ସ’। ନୂଆ ପୋଷାକ​‌େ​‌ର ଭାରତୀୟ ଫୁଟ୍‌ବଲ ଦଳ ନୂଆବର୍ଷରେ ନୂତନ ଦିଗନ୍ତ ହାସଲ କରିବ ବୋଲି ଏଆଇଏଫ୍‌ଏଫ୍‌ର ସଭାପତି ପ୍ରଫୁଲ୍ଲ ପଟେଲ କହିଛନ୍ତି।

Comments
Loading...