ଘୂର୍ଣ୍ଣିଝଡ଼ ରୂପ ନେଉଛି ‘ଫେଥାଇ’ ଆଜିଠୁ ଦକ୍ଷିଣରେ ବର୍ଷା

0

ଭୁବନେଶ୍ୱର: ଦକ୍ଷିଣ-ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ‘ଫେଥାଇ’ କ୍ରମଶଃ ଘନୀଭୂତ ହେବାରେ ଲାଗିଛି। ଏହାର ପ୍ରଭାବରେ ଆସନ୍ତାକାଲିଠାରୁ ଦକ୍ଷିଣ ଓଡ଼ିଶାର ବିଭିନ୍ନ ଜିଲାରେ ବର୍ଷା ସମ୍ଭାବନା ଥିବାବେଳେ ୧୭ରେ ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାର ୧୩ଟି ଜିଲାରେ ପ୍ରବଳ ବର୍ଷା ହେବ ବୋଲି ଭାରତୀୟ ପାଣିପାଗ ବିଭାଗ ସୂଚନା ଦେଇଛି। ତେବେ ରାଜ୍ୟରେ ଖରିଫଋତୁ ଲାଗି ଧାନ ସଂଗ୍ରହ ସମୟ ହୋଇଥିବାରୁ ବର୍ଷା ପ୍ରଭାବରେ ଚାଷୀମାନେ ଯେଭଳି କ୍ଷତିଗ୍ରସ୍ତ ନହୁଅନ୍ତି ସେଥିପ୍ରତି ସବୁ ଜିଲାପାଳ ସତର୍କ ରହିବା ଲାଗି ନିର୍ଦେଶନାମା ଜାରି ହୋଇଛି ବୋଲି ରାଜ୍ୟ ବିପର୍ଯ୍ୟୟ ପରିଚାଳନା ବିଭାଗ ଯୁଗ୍ମ ସଚିବ ପ୍ରଭାତ ମହାପାତ୍ର କହିଛନ୍ତି।
ଶ୍ରୀ ମହାପାତ୍ରଙ୍କ ସୂଚନା ଅନୁଯାୟୀ ଦକ୍ଷିଣ ପୂର୍ବ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଚେନ୍ନଇଠାରୁ ପୂର୍ବାହ୍ନ ୧୦ଟାରେ ପ୍ରାୟ ୪୦୦କିମି ଦୂରରେ ରହିଥିବାବେଳେ ସନ୍ଧ୍ୟା ସୁଦ୍ଧା ଏହା ୨୨୦କିମି ଦୂରରେ ପହଞ୍ଚିଥିଲା। ଏହି ଲଘୁଚାପ ଆସନ୍ତାକାଲି ସକାଳେ ଘୂର୍ଣ୍ଣିଝଡର ରୂପ ନେବାର ସମ୍ଭାବନା ରହିଛି। ଆସନ୍ତାକାଲି ରାଜ୍ୟର ଦକ୍ଷିଣାଞ୍ଚଳ ତଥା ଗଜପତି, ଗଞ୍ଜାମ, ରାୟଗଡା ଓ କଳାହାଣ୍ଡିରେ ବର୍ଷା ହେବାର ସମ୍ଭାବନା ରହିଛି। ୧୭ରେ ମାଲକାନାଗିରି, କୋରାପୁଟ, ରାୟଗଡା, ନବରଙ୍ଗପୁର, କଳାହାଣ୍ଡି, କନ୍ଧମାଳ, ନୂଆପଡା, ବରଗଡ଼, ବଲାଙ୍ଗିର, ଝାରସୁଗୁଡା ଓ ସମ୍ବଲପୁର ପ୍ରଭୃତି ଜିଲାରେ ବର୍ଷା ହେବ।
ଏହାକୁ ଦୃଷ୍ଟିିରେ ରଖି ମତ୍ସ୍ୟଜୀବୀମାନଙ୍କୁ ସମୁଦ୍ର ଭିତରକୁ ଯିବାକୁ ବାରଣ କରାଯାଇଛି। ଏହାସହିତ ଯେଉଁମାନେ ସମୁଦ୍ର ମଧ୍ୟରେ ରହିଛନ୍ତି ସେମାନଙ୍କୁ ସୁରକ୍ଷିତ ସ୍ଥାନକୁ ଆସିବାପାଇଁ ପରାମର୍ଶ ଦିଆଯାଇଛି। ଏହି ସମୟରେ ଚାଷୀମାନେ ଯେଭଳି ପ୍ରଭାବିତ ନହୁଅନ୍ତି ସେଥିପ୍ରତି ଦୃଷ୍ଟି ଦେବାକୁ ଜିଲାପାଳମାନଙ୍କୁ ନିର୍ଦେଶ ଦିଆଯାଇଥିବା ଶ୍ରୀ ମହାପାତ୍ର କହିଛନ୍ତି।

Comments
Loading...