ଆରବିଆଇର ନଗଦ ଆବଶ୍ୟକ: ଉର୍ଜିତ

0

ନୂଆଦିଲ୍ଲୀ: ଅତ୍ୟାବଶ୍ୟକ ଚାହିଦା ପୂରଣ ଓ ମୁଦ୍ରା ବଜାରରେ ଅସ୍ଥିରତା ପରିଚାଳନା ପାଇଁ ଭାରତୀୟ ରିଜର୍ଭ ବ୍ୟାଙ୍କକୁ ନଗଦ ଜମା ଆବଶ୍ୟକ। ତେଣୁ ଆରବିଆଇ ଭଣ୍ଡାରରେ ପର୍ଯ୍ୟାପ୍ତ ପରିମାଣାରେ ନଗଦ ମହଜୁଦ ରଖିବାକୁ ପଡ଼ିବ। ସଂସଦୀୟ କମିଟି ଆଗରେ ମଙ୍ଗଳବାର ଆରବିଆଇ ଗଭର୍ଣ୍ଣର ଉର୍ଜିତ ପଟେଲ ଉପରୋକ୍ତ ମତ ଦେଇଛନ୍ତି। ଏହି ମନ୍ତବ୍ୟ ଜରିଆରେ ଉର୍ଜିତ କେନ୍ଦ୍ର ସରକାରଙ୍କୁ ନଗଦ ହସ୍ତାନ୍ତର ପାଇଁ ଅସମ୍ମତ ଥିବା ପରୋକ୍ଷରେ ଜଣାଇ ଦେଇଛନ୍ତି।
ସୂଚନାଯୋଗ୍ୟ, ଭାରତୀୟ ରିଜର୍ଭ ବ୍ୟାଙ୍କ ପାଖରେ ପ୍ରାୟ ୯.୭ଲକ୍ଷ କୋଟି ଟଙ୍କାର ନଗଦ ରହିଛି। ଜନକଲ୍ୟାଣ ଲାଗି ଏଥିରୁ ଏକ-ତୃତୀୟାଂଶ ହସ୍ତାନ୍ତର କରିବାକୁ କେନ୍ଦ୍ର ସରକାର ଆରବିଆଇ ଉପରେ ଚାପ ପକାଇ ଆସୁଛନ୍ତି। ଏହାକୁ ନେଇ ଆରବିଆଇ ଓ କେନ୍ଦ୍ର ସରକାରଙ୍କ ମଧ୍ୟରେ ମତାନ୍ତର ଦେଖାଦେଇଛି। ଏହି ବିବାଦକୁ ନେଇ କେନ୍ଦ୍ର ସରକାର ଆରବିଆଇର ଧାରା ୭ ପ୍ରୟୋଗ କରିପାରନ୍ତି ଏବଂ ଏହି ବିବାଦ ଓ ମତଭେଦକୁ ନେଇ ଉର୍ଜିତ ଇସ୍ତଫା ଦେଇପାରନ୍ତି ବୋଲି ଚର୍ଚ୍ଚା ଚାଲିଥିଲା।
ଆରବିଆଇର ନିର୍ଦେଶନା ମଣ୍ଡଳୀ ବୈଠକ ପରେ ଏହି ବିବାଦ ଆପାତତଃ ଥମି ଯାଇଥିଲେ ହେଁ ସମ୍ପୂର୍ଣ୍ଣ ସମାଧାନ ହୋଇପାରିନାହିଁ।
ଏଭଳି ସମୟରେ ଉର୍ଜିତ ସଂସଦୀୟ କମିଟି ସମ୍ମୁଖରେ ହାଜର ହୋଇ କେତେକ ମତ ରଖିଥିଲେ। କଂଗ୍ରେସର ବରିଷ୍ଠ ନେତା ଏମ୍‍ ବିରାପ୍ପା ମୋଇଲୀଙ୍କ ଅଧ୍ୟକ୍ଷତାରେ ଗଠିତ କମିଟିରେ ଆରବିଆଇ ନଗଦ ଜମା ପ୍ରସଙ୍ଗ ସହିତ, ବିମୁଦ୍ରାକରଣ ପରବର୍ତ୍ତୀ ସ୍ଥିତି, ମୁଦ୍ରାସ୍ଫୀତି ଓ ଋଣ ବଜାର ଆଦି ବିଷୟରେ ଆଲୋଚନା ହୋଇଥିବା ଜଣାପଡ଼ିଛି।

Comments
Loading...