ନୂଆଦିଲ୍ଲୀ: ମୁଖ୍ୟ ନିର୍ବାଚନ ଆୟୋଗଙ୍କ ବୈଠକ ଶନିବାର ଅପରାହ୍ଣରେ ଅନୁଷ୍ଠିତ ହେବ। ଏହି ଅବସରରେ ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼, ମିଜୋରାମ୍ ଓ ତେଲେଙ୍ଗାନାର ବିଧାନସଭା ନିର୍ବାଚନ ତାରିଖ ଘୋଷଣା ହେବାର ସମ୍ଭାବନା ରହିଛି। ପ୍ରଥମ ଚାରିଟି ରାଜ୍ୟର ବିଧାନ ସଭା କାର୍ଯ୍ୟକାଳ ସମାପ୍ତ ହେବାକୁ ଯାଉଥିବା ବେଳେ ଆଗୁଆ ନିର୍ବାଚନ ପାଇଁ ତେଲେଙ୍ଗାନା ସରକାର ଗତ ମାସରେ ବିଧାନସଭା ଭଙ୍ଗ କରିଥିଲେ। ନିର୍ବାଚନ ତାରିଖ ଘୋଷଣା ହେବା ମାତ୍ରେ ଉପରୋକ୍ତ ୫ଟି ରାଜ୍ୟରେ ନିର୍ବାଚନ ଆଚରଣ ବିଧି ଲାଗୁ ହେବ।
ଉପରୋକ୍ତ ୫ଟି ରାଜ୍ୟ ମଧ୍ୟରୁ ମଧ୍ୟପ୍ରଦେଶ, ରାଜସ୍ଥାନ, ଛତିଶଗଡ଼ରେ ବିଜେପି ଶାସନ କ୍ଷମତାରେ ଥିବାବେଳେ ମିଜେରାମ୍ରେ କଂଗ୍ରେସ ସରକାର ଗଢ଼ିଛି। ସେହିପରି ତେଲେଙ୍ଗାନାରେ କେ ଚନ୍ଦ୍ରଶେଖର ରାଓଙ୍କ ଟିଆରଏସ୍ ସରକାର ଗଢ଼ିଥିଲା।
ଇତିମଧ୍ୟରେ ନିର୍ବାଚନ ପାଇଁ ସବୁ ରାଜନୈତିକ ଦଳ ଜୋରଦାର ପ୍ରସ୍ତୁତି ଆରମ୍ଭ କରିସାରିଛନ୍ତି। ମଧ୍ୟପ୍ରଦେଶରେ ବିଜେପି ବଡ଼ ଧରଣର ସମାବେଶ କରିଥିବା ବେଳେ ସେଥିରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ବିଜେପି ଅଧ୍ୟକ୍ଷ ଅମିତ ଶାହା ନିର୍ବାଚନ ବିଗୁଲ୍ ଫୁଙ୍କିଥିଲେ। ସେହିପରି ସେ ଆଜି ରାଜସ୍ଥାନରେ ଆଜମେର ଗସ୍ତ କରିବା କାର୍ଯ୍ୟକ୍ରମ ରହିଛି।
ମଧ୍ୟପ୍ରଦେଶରେ ଏବେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ସମେତ ବିଜେପି ଅଧ୍ୟକ୍ଷ ଅମିତ ଶାହା ଡେରା ପକାଇଛନ୍ତି। ଆଦିବାସୀ ବହୁଳ ମାଲ୍ୱା-ନିମାଦ ଅଞ୍ଚଳରୁ ବିଜେପି ନିର୍ବାଚନ ପ୍ରଚାର ଆରମ୍ଭ କରିବ ବୋଲି ଜଣାପଡ଼ିଛି।
