ଲମତାପୁଟ: ଯୋଜନାବଦ୍ଧ ଭାବେ ଜଣେ ଦୁର୍ଦାନ୍ତ ମାଓବାଦୀ ଓ ତାଙ୍କ ସହଯୋଗୀମାନେ ଡକାୟତି କରୁଥିବା ବେଳେ ଅନକାଡେଲିସ୍ଥିତ ବିଏସଏଫ ଯବାନମାନଙ୍କ ଦ୍ୱାରା ଗିରଫ ହୋଇଛନ୍ତି। ଏମାନଙ୍କୁ ମାଛକୁଣ୍ଡ ଥାନାକୁ ହସ୍ତାନ୍ତର କରାଯାଇଛି। ଡକାୟତିର ଶିବାର ହୋଇଥିବା ବ୍ୟକ୍ତି ଜଣକ ମାଛକୁଣ୍ଡ ଥାନାରେ ଲିଖିତ ଅଭିଯୋଗ କରିଛନ୍ତି। ଗତ ଶନିବାର ରାତିରେ ମାଛକୁଣ୍ଡ ଥାନା ହନୁମାଲ ଗାଁର ଶ୍ୟାମ ବଡନାୟକଙ୍କ ଘରେ ଏହି ଡକାୟତି ହୋଇଥିଲା। ମାଲକାନଗିରି ଜିଲା ଚିତ୍ରକଣ୍ଡା ଥାନା ବେଚେଲପଦର ଗାଁର ଭୀମ ଖରା, ଲିଭ ପାଙ୍ଗି, ରାମ ପାଙ୍ଗି, ଲଇଚନ ପାଙ୍ଗି, ମଲକି ଖରା ସମେତ କିଛି ଲୋକ ଜୋର ଜବରଦସ୍ତ ତାଙ୍କ ଘରେ ପଶି ଟଙ୍କା ଆଦାୟ କରିବା ସହ ପରିବାର ଲୋକଙ୍କୁ ମାରପିଟ କରିଥିବା ଖବର ପାଇଁ ଅନକାଡେଲିସ୍ଥିତ ବିଏସଏଫ ଯବାନମାନେ ହନୁମାଲ ଗାଁରେ ପହଞ୍ଚ ଥିଲେ। ଦୁର୍ବୃତ୍ତଙ୍କୁ କାବୁ କରିବାରେ ସଫଳ ହୋଇଥିଲେ। ଏମାନଙ୍କ ମଧ୍ୟରେ ଜଣେ ଦୁର୍ଦାନ୍ତ ମାଓବାଦୀ ଥିବା ଜଣାପଡିଥିଲା। ଏ ନେଇ ରବିବାର ବିଏସଏଫ ପକ୍ଷରୁ ସମସ୍ତଙ୍କୁ ମାଛକୁଣ୍ଡ ଥାନାକୁ ହସ୍ତାନ୍ତର କରାଯାଇଛି। ମାଛକୁଣ୍ଡ ପୁଲିସର ପ୍ରାଥମିକ ତଦନ୍ତରୁ ଜଣାଯାଇଛି ଯେ, ରାମ ପାଙ୍ଗି ଜଣେ ଦୁର୍ଦାନ୍ତ ମାଓବାଦୀ ଓ ସେ ବିଭିନ୍ନ ଆପରାଧିକ ମାମଲାରେ ଜଡିତ ଅଛନ୍ତି। ଅନ୍ୟ ୪ଜଣ ସହଯୋଗୀଙ୍କୁ ମଧ୍ୟ ମାଛକୁଣ୍ଡ ପୁଲିସ ଡକାୟତି ଅଭିଯୋଗରେ ଗିରଫ କରି ତହନ୍ତ ଆରମ୍ଭ କରିଛି।
