କଂଗ୍ରେସ ବିଧାୟକ ପ୍ରାର୍ଥୀ ମନୋଜ ଜେନା ହତ୍ୟା ମାମଲା : ମଦ ବ୍ୟବସାୟ ମୁଖ୍ୟ କାରଣ ଥିବା ସୂଚନା

ବ୍ରହ୍ମପୁର: ଗଂଜାମ ଜିଲା ଆସିକା କଂଗ୍ରେସ ବିଧାୟକ ପ୍ରାର୍ଥୀ ମନୋଜ ଜେନାଙ୍କ ହତ୍ୟାକାଣ୍ଡ ପଛରେ ମଦ ବ୍ୟବସାୟ ମୁଖ୍ୟ କାରଣ ବୋଲି ସୂଚନା ମିଳିଛି। ଘଟଣାର ୭ ଦିନ ପରେ ମଧ୍ୟ ପୁଲିସ ଅଭିଯୁକ୍ତଙ୍କୁ ଗିରଫ କରିବାରେ ସକ୍ଷମ ହୋଇପାରିନାହିଁ । ମନୋଜଙ୍କ ସହଯୋଗୀଙ୍କ ଏତଲା ଆଧାରରେ ପୁଲିସ ୭ ଜଣ ଅଭିଯୁକ୍ତଙ୍କ ନାମରେ ମାମଲା ରୁଜୁ କରିବା ସହ ସେମାନଙ୍କ ନାମରେ ଲୁକଆଉଟ ସରକୁଲାର ଜାରି କରିଛି । ସେହିପରି ସମସ୍ତ ଅଭିଯୁକ୍ତଙ୍କ ବ୍ୟାଙ୍କ ଆକାଉଣ୍ଟ ଅଚଳ ପାଇଁ ପୁଲିସ ପ୍ରୟାସ ଜାରି ରଖିଛି । ତେବେ ଘଟଣା ପରଠାରୁ ଅଭିଯୁକ୍ତମାନେ ଫେରାର ଥିବାରୁ ପୁଲିସ ସେମାନଙ୍କୁ କାବୁ କରିପାରିନାହିଁ । ପୁଲିସର ୩ ଜଣିଆ ସ୍ୱତନ୍ତ୍ର ଦଳ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିବା ବେଳେ ବ୍ରହ୍ମପୁର, ଆସିକା ଓ ଭଞ୍ଜନଗର ଅଞ୍ଚଳର ୧୦ରୁ ଉର୍ଦ୍ଧ୍ବ ବ୍ୟକ୍ତିଙ୍କୁ ସନ୍ଦେହରେ ଥାନାକୁ ଆଣି ପଚରାଉଚରା ଜାରି ରଖିଛି । ତେବେ ଅଭିଯୁକ୍ତ ଚିହ୍ନଟ ହୋଇସାରିଛନ୍ତି ଏବଂ ସେମାନେ ଖୁବଶୀଘ୍ର ଧରାହେବେ ବୋଲି ବ୍ରହ୍ମପୁର ଅତିରିକ୍ତ ଏସପି ପ୍ରଭାତ ରାଉତରାୟ କହିଛନ୍ତି । ସୂଚନାଯୋଗ୍ୟ, ୨୨ ତାରିଖରେ ମଦ ବ୍ୟବସାୟୀ ମନୋଜ ନିଜ କାର ଯୋଗେ ଭୁବନେଶ୍ୱରରୁ ବ୍ରହ୍ମପୁର ଫେରୁଥିବାବେଳେ ବ୍ରହ୍ମପୁର ଲାଞ୍ଜିପଲ୍ଲୀ ବାଇପାସ ତଥା ଜତୀୟ ରାଜପଥ ୧୬ କଡ଼ରେ ତାଙ୍କ ଉପରକୁ ଗୁଳି ମାଡ଼ ହେବା ସହ ତାଙ୍କ ବେକକୁ ଏକ ଧାରୁଆ ଅସ୍ତ୍ରରେ କାଟି ଦୁର୍ବୃତ୍ତ ଫେରାର ହୋଇଯାଇଥିଲେ । ଘଟଣାର ଗୋଟିଏ ଦିନ ପରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଥିଲା ।