ଆୟାପ୍ପାସ୍ୱାମୀଙ୍କୁ ଦର୍ଶନ କରିଥିବା ଦୁଇ ମହିଳାଙ୍କ ଜୀବନ ପ୍ରତି ବିପଦ

0
141

ଥିରୁଭାନନ୍ଥପୁରମ୍‍: ସ୍ଥାନୀୟ ଜନସାଧାରଣ ଓ ବିଭିନ୍ନ ଧାର୍ମିକ ସଂଗଠନର ବିରୋଧ ସତ୍ତେ୍ୱ ଶାବରୀମାଳା ମନ୍ଦିରରେ ପ୍ରବେଶ କରି ଆୟାପ୍ପାସ୍ୱାମୀଙ୍କ ଦର୍ଶନ କରିଥିବା ଦୁଇ ମହିଳାଙ୍କ ଜୀବନ ପ୍ରତି ବିପଦ ସୃଷ୍ଟି ହୋଇଛି। ବିରୋଧୀଙ୍କ ଧମକ ପରେ ସେମାନେ ଭୟରେ ଘରକୁ ଫେରି ପାରୁ ନଥିବା ଅଭିଯୋଗ ହୋଇଛି।
ଶାବରୀମାଳାରେ ୧୦ ରୁ ୫୦ ବର୍ଷ ବର୍ଗର ମହିଳାଙ୍କ ପ୍ରବେଶ ଉପରେ କଟକଣା ରହିଛି। ଗତ ବର୍ଷ ସେପ୍ଟେମ୍ବର ମାସରେ ସୁପ୍ରିମକୋର୍ଟ ଏହି କଟକଣା ହଟାଇ ମନ୍ଦିରରେ ସବୁ ବର୍ଗର ମହିଳାଙ୍କ ପ୍ରବେଶ ଅଧିକାର ରହିଛି ବୋଲି ରାୟ ଦେଇଥିଲେ। ସୁପ୍ରିମକୋର୍ଟଙ୍କ ଏହି ଯୁଗାନ୍ତକାରୀ ରାୟ ପରେ ବିବାଦ ତୀବ୍ର ହୋଇଥିଲା। ସୁପ୍ରିମକୋର୍ଟଙ୍କ ରାୟକୁ କାର୍ଯ୍ୟକାରୀ କରିବା ପାଇଁ କେରଳର ପି ବିଜୟନ ସରକାର ଘୋଷଣା କରିଥିବା ବେଳେ ସ୍ଥାନୀୟ ଜନସାଧାରଣଙ୍କ ସମେତ ବିଭିନ୍ନ ରାଜନୈତିକ ଓ ଦଳୀୟ ସଂଗଠନ ବିରୋଧ କରୁଛନ୍ତି। ସୁପ୍ରିମକୋର୍ଟଙ୍କ ରାୟ ପରେ ବିଭିନ୍ନ ସମୟରେ ମହିଳାମାନେ ମନ୍ଦିର ପ୍ରବେଶ କରିବାକୁ ଉଦ୍ୟମ କରିବାରୁ ଉତ୍ତେଜନା ସୃଷ୍ଟି ହୋଇଥିଲା। ଗତ ୨ ତାରିଖ ଭୋର ସମୟରେ ବିନ୍ଦୁ ଆମ୍ମିନି ଓ କନକ ଦୁର୍ଗା ନାମ୍ନୀ ଦୁଇ ମହିଳା ଶହ ଶହ ବର୍ଷର ପରମ୍ପରା ଭାଙ୍ଗି ଶାବରୀମାଳା ମନ୍ଦିରରେ ପ୍ରବେଶ କରି ପୂଜାର୍ଚ୍ଚନା କରିଥିଲେ। ଏହାକୁ ନେଇ ଉତ୍ତେଜନା ତୀବ୍ର ହୋଇଥିଲା। ହିଂସାକାଣ୍ଡରେ ଜଣଙ୍କ ମୃତ୍ୟୁ ଘଟିଥିବା ବେଳେ ଶତାଧିକ ଆହତ ହୋଇଥିଲେ। ଶତାଧିକଙ୍କୁ ପୁଲିସ ଗିରଫ କରିଛି। ଏହା ପରେ ପରେ ଗତ ୪ ତାରିଖ ଦିନ ଆଉ ଜଣେ ୪୬ ବର୍ଷୀୟ ମହିଳା ମନ୍ଦିରରେ ପ୍ରବେଶ କରିଥିଲେ।
ଏହି ଘଟଣା ପରେ ସମ୍ପୃକ୍ତ ମହିଳାଙ୍କୁ ବିଭିନ୍ନ ସଂଗଠନ ପକ୍ଷରୁ ଧମକ ଚମକ ମିିଳିଥିବା ଅଭିଯୋଗ ଆସିଛି। କୌଣସି ଅଘଟଣକୁ ଏଡ଼ାଇବା ପାଇଁ ପୁଲିସ ପ୍ରଶାସନ ସେମାନଙ୍କୁ କୋଚିର ଏକ ସ୍ଥାନରେ ସୁରକ୍ଷା ବଳୟରେ ରଖିଥିବା ଜଣାଇଛି।

LEAVE A REPLY

Please enter your comment!
Please enter your name here