ରାସ୍ତା କଡରେ ମହିଳାଙ୍କ ପ୍ରସବ

ବ୍ରହ୍ମପୁର : ଜାତୀୟ ରାଜପଥ କଡରେ ଜଣେ ମହିଳା ଗୋଟିଏ ଶିଶୁ କନ୍ୟାକୁ ଜନ୍ମ ଦେଇଛନ୍ତି । ଶୁକ୍ରବାର ସକାଳ ୯ଟାରେ ବ୍ରହ୍ମପୁର ଏମକେସିଜି ମେଡିକାଲ କଲେଜ ଓ ହସପିଟାଲଠାରୁ ଅଧ କି.ମି ଦୂରରେ ଏହି ଘଟଣା ଘଟିଛି । ଯାହାକୁ ନେଇ ବିଭିନ୍ନ ମହଲରେ ପ୍ରତିକ୍ରିୟା ପ୍ରକାଶ ପାଇଛି।
ଗଂଜାମ ଜିଲ୍ଲା ପତ୍ରପୁର ବ୍ଲକ ସମାନ୍ତିଆପଲ୍ଲୀର ଗର୍ଭବତୀ ମହିଳା କେ. ପାର୍ବତୀ ଆଜି ସକାଳେ ନିଜ ସ୍ୱାମୀ ଓ 4 ବର୍ଷର ପୁଅ ସହ ଏମକେସିଜି କୁ ଚିକିତ୍ସା ପାଇଁ ଆସିଥିଲେ । ଅଟୋରେ ବ୍ରହ୍ମପୁର ପହଞ୍ଚିବା ପରେ ଏମକେସିଜି ଠାରୁ କିଛି ଦୂରରେ ଥିବା ଏକ ଘରୋଇ ନିଦାନ କେନ୍ଦ୍ରରେ ପରୀକ୍ଷା କରାଇବାକୁ ଅଟକି ଥିଲେ । ମହିଳା ଓ ପୁଅକୁ ଜାତୀୟ ରାଜପଥ ୫୯ କଡରେ ଛିଡାକରାଇ ତାଙ୍କ ସ୍ବାମୀ ରାସ୍ତାର ଅପରପାଶ୍ୱରେ ଥିବା ନିଦାନ କେନ୍ଦ୍ରକୁ ରିପୋର୍ଟ ଆଣିବାକୁ ଯାଇଥିଲେ । ଏହି ସମୟରେ ମହିଳାଙ୍କ ଗର୍ଭ ଯନ୍ତ୍ରଣା ହୋଇଥିଲା । ସେ ରାସ୍ତା କଡରେ ବସି ପଡ଼ି ଛଟପଟ ହେଉଥିଲେ । ସେହି ବାଟ ଦେଇ ଯାଉଥିବା କିଛି ମହିଳା ତାଙ୍କ ନିକଟକୁ ଆସି ସହାୟତାର ହାତ ବଢାଇଥିଲେ । ଚାରିପାଖେ ଲୁଗା ଘେରାଇ ମହିଳାଙ୍କ ପ୍ରସବ କରାଇଥିଲେ । ଶିଶୁ କନ୍ୟାଟି ଜନ୍ମ ହୋଇସାରିବା ପରେ ଏମକେସିଜିରୁ ଜନନୀ ଏକ୍ସପ୍ରେସ ଆସି ଉଭୟ ମା ଓ ଝିଅଙ୍କୁ ନେଇ ଡାକ୍ତରଖାନାରେ ଭର୍ତି କରିଥିଲା । ବର୍ତ୍ତମାନ ଉଭୟଙ୍କ ସ୍ୱାସ୍ଥ୍ୟ ଠିକ ଥିବା ଡାକ୍ତର କହିଛନ୍ତି । ଏହି ଘଟଣା ସହରରେ ବେଶ ଚର୍ଚ୍ଚାର ବିଷୟ ପାଲଟିଛି ।

Comments are closed.