ବୁଲନ୍ଦସହର ହିଂସାରେ ଇନ୍ସପେକ୍ଟର ସୁବୋଧ ସିଂହଙ୍କ ହତ୍ୟା ଅଭିଯୁକ୍ତ ଯବାନ ଜିତୁ ଗିରଫ

0
181

ନୂଆଦିଲ୍ଲୀ: ଉତ୍ତରପ୍ରଦେଶର ବୁଲନ୍ଦସହରରେ ଇନ୍ସପେକ୍ଟର ସୁବୋଧ ସିଂହଙ୍କ ହତ୍ୟା ଅଭିଯୁକ୍ତ ଜିତେନ୍ଦ୍ର ମଲ୍ଲିକ ତଥା ଯବନା ଜିତୁ ପୁଲିସ ହାତରେ ଧରା ପଡ଼ିଛି। ଜିତୁ ରାଷ୍ଟ୍ରୀୟ ରାଇଫେଲରେ ଯବାନ ଭାବେ କାର୍ଯ୍ୟରତ ଥିବାବେଳେ ହିଂସା ଦିନ ଘଟଣାସ୍ଥଳରେ ଉପସ୍ଥିତ ଥିଲା। ଶୁକ୍ରବାର ବିଳମ୍ବିତ ରାତିରେ ଜିତୁକୁ ପୁଲିସ ଗିରଫ କରିଥିଲା। ପରିସ୍ଥିତିକୁ ଦୃଷ୍ଟିରେ ରଖି ଜିତୁକୁ ସହରଠାରୁ ଦୂରରେ ପଚରାଉଚରା କରାଯାଉଛି। ସନ୍ଧ୍ୟାରେ ଜିତୁକୁ ବୁଲନ୍ଦସହରକୁ ଅଣାଯିବାର କାର୍ଯ୍ୟକ୍ରମ ରହିଛି। ରାଷ୍ଟ୍ରୀୟ ରାଇଫେଲରେ ଯବାନ ଭାବେ କାର୍ଯ୍ୟରତ ଜିତୁ ୧୫ଦିନର ଛୁଟି ନେଇ ଘରକୁ ଆସିଥିଲା। ଗୋ-ମାଂସକୁ ନେଇ ସହରରେ ହିଂସାକାଣ୍ଡ ଘଟିବା ସମୟରେ ଜିତୁ ସହରରେ ଉପସ୍ଥିତ ଥିଲା। ତେବେ ପରେ ସେ ସୋପୋରରେ ଆତ୍ମଗୋପନ କରିଥିବା ଜଣାପଡ଼ିଥିଲା।
ଜିତୁକୁ ବୁଲନ୍ଦସହରରେ ଘଟିଥିବା ହିଂସାକାଣ୍ଡରେ ପୁଲିସକୁ ସହଯୋଗ କରିବାକୁ ସେନା ପକ୍ଷରୁ ଜିତୁକୁ ନିର୍ଦେଶ ଦିଆଯାଇଛି। ଏ ସମ୍ପର୍କରେ ସେନାକୁ ଜିତୁ ସ୍ପଷ୍ଟିକରଣ ଲିଖିତ ଭାବେ ପ୍ରଦାନ କରିଛି। ଚାଷ ଜମିରେ ଗୋ-ମାଂସ ମିଳିବା ଘଟଣା ଦିନ ସେ ବୁଲନ୍ଦସହରରେ ଥିଲା। ଖବର ପାଇଁ ସେ ଘଟଣାସ୍ଥଳକୁ ପରିଦର୍ଶନ ପାଇଁ ଯାଇଥିବା ସେ ସେନା ସମ୍ମୁଖରେ ସ୍ୱୀକାର ମଧ୍ୟ କରିଛି। ତେବେ ହିଂସାକାଣ୍ଡ ସମୟରେ ସେଠାରେ ଉପସ୍ଥିତ ନଥିଲା। ସେତେବେଳେ ସେ ଗ୍ରାମବାସୀଙ୍କ ସହ ଗାଁରେ ଥିବା ପ୍ରକାଶ କରିଛି।
ଅଦ୍ୟାବଧି ଜିତୁର ଗୁଳିରେ ସୁବୋଧ ସିଂହଙ୍କ ମୃତ୍ୟୁ ହୋଇଥିବା ପ୍ରମାଣିତ ହୋଇ ନାହିଁ। ପୁଲିସ ଇନ୍ସପେକ୍ଟରଙ୍କୁ ହତ୍ୟା ପ୍ରଚ୍ଛଦରେ ଜିତୁର ହାତ ରହିଛି ବୋଲି ପୁଲିସ ସନ୍ଦେହ କରୁଛି। ଅବଶ୍ୟ ପୁଲିସ ଏଫଆଇଆରରେ ମୁଖ୍ୟ ଅଭିଯୁକ୍ତ ଭାବେ ବଜରଙ୍ଗ ଦଳର ଜିଲା ସଂଯୋଜକ ଯୋଗେଶ ରାଜଙ୍କୁ ଦର୍ଶାଯାଇଛି।
ସୁତ୍ରରୁ ମିଳିଥିବା ତଥ୍ୟ ଅନୁଯାୟୀ ଜିତୁକୁ ଧରିବାକୁ ପୁଲିସର ଦୁଇଟି ଟିମ ଗଠନ କରାଯାଇ ଥିଲା। ଗୋଟିଏ ଟିମ ୟୁପି ପୁଲିସ ଗଠନ କରିଥିବାବେଳେ ଅନ୍ୟଟି ଏଟିଏସ ଦ୍ୱାରା ଗଠନ କରାଯାଇଛି। ଉଭୟ ଟିମ ଜମ୍ମୁ-କାଶ୍ମୀର ଯାଇ ଜିତୁ ସମ୍ପର୍କରେ ତଦନ୍ତ ଆରମ୍ଭ କରିଛନ୍ତି।

LEAVE A REPLY

Please enter your comment!
Please enter your name here