ବଜ୍ରପାତରେ ଜଣେ ମୃତ, ଜଣେ ଗୁରୁତର

ଖଡିଆଳ : ନୂଆପଡା ଜିଲା କୋମନା ବ୍ଲକ ଜଟଗଡ ଗ୍ରାମରେ ବଜ୍ରପାତରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟଜଣେ ଗୁରୁତର ହୋଇଛନ୍ତି। ସୂଚନା ମୁତାବକ, ଜଟଗଡ ଗ୍ରାମର କିର୍ତ୍ତନ ପ୍ରଧାନ(୫୦) ଏବଂ ଜୟଦେବ ମାଝୀ(୪୫) ଅପରାହ୍ନ ୪ ଘଣ୍ଟା ସମୟରେ ଗାଇ ଚରାଇବାକୁ ନିକଟସ୍ଥ ପଡିଆକୁ ନେଇଥିଲେ। ଏହି ସମୟରେ ଘଡ଼ଘଡ଼ି, ବିଜୁଳି ସହ ପ୍ରବଳ ବର୍ଷା ହୋଇଥିଲା। ଫଳରେ କିର୍ତ୍ତନ ଏବଂ ଜୟଦେବ ଏକ ଗଛ ମୂଳରେ ଆଶ୍ରୟ ନେଇଥିବା ବେଳେ ବଜ୍ରାଘାତ ହେବାରୁୁ ଘଟଣା ସ୍ଥଳରେ କିର୍ତ୍ତନଙ୍କର ମୃତ୍ୟୁ ଘଟିଥିଲା। ଗୁରୁତର ଅବସ୍ଥାରେ ଜୟଦେବଙ୍କୁ ନୂଆପଡା ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଜୟଦେବଙ୍କ ଅବସ୍ଥା ମଧ୍ୟ ସଙ୍କଟାପନ୍ନ ଥିବା ସୂଚନା ମିଳିଛି।
ସେହିପରି ଖଡିଆଳ ବ୍ଲକର ବିରିଘାଟ ପଞ୍ଚାୟତର କୁଶମାଲ ଗ୍ରାମର ପଦ୍ମନ ମାଝୀଙ୍କର ଏକ ବଳଦ ପଡିଆରେ ଘାସ ଖାଉଥିବା ବେଳେ ବଜ୍ରପାତ ହେବାର ମୃତ୍ୟୁ ହୋଇଯାଇଛି। ଜିଲା ପ୍ରଶାସନ ତୁରନ୍ତ ଦୃଷ୍ଟି ଦେଇ କ୍ଷତିଗ୍ରସ୍ଥ ପରିବାର ମାନଙ୍କୁ ଉପଯୁକ୍ତ କ୍ଷତିପୂରଣ ପ୍ରଦାନ କରିବାକୁ ସାଧାରଣରେ ଦାବି ହେଉଛି।

Comments are closed.