ନୂଆଦିଲ୍ଲୀ: ଦୀର୍ଘ ୫ ବର୍ଷର ସାମରିକ ଶାସନ ପରେ ଥାଇଲାଣ୍ଡରେ ପ୍ରଥମଥର ପାଇଁ ଆଜି ସାଧାରଣ ନିର୍ବାଚନ ଅନୁଷ୍ଠିତ ହେଉଛି। ଆଜି (ରବିବାର) ସକାଳୁ ସେଠାରେ ମତଦାନ ଆରମ୍ଭ ହୋଇଛି। ଦେଶର ଆଧୁନିକ ଇତିହାସରେ ଏହି ନିର୍ବାଚନକୁ ବିଶେଷ ଗୁରୁତ୍ୱ ଦିଆଯାଉଛି। ନିର୍ବାଚନ ପୂର୍ବରୁ ଦେଶର ବିଭିନ୍ନ ପ୍ରମୁଖ ରାଜନୈତିକ ଦଳଗୁଡ଼ିକ ପକ୍ଷରୁ ସଭାସମିତିମାନ ଆୟୋଜିତ ହୋଇଥିଲା। ମୁଖ୍ୟ ଦଳଗୁଡ଼ିକର ପ୍ରଧାନମନ୍ତ୍ରୀ ପ୍ରାର୍ଥୀମାନେ ରାଜଧାନୀରେ ର୍ୟାଲି ଓ ସଭା କରିଥିଲେ। ଏହି ପ୍ରମୁଖ ନେତାମାନଙ୍କ ମଧ୍ୟରେ ବର୍ତ୍ତମାନର ସାମରିକ ଶାସନର ମୁଖ୍ୟ ପ୍ରୟୁତ ଚାନ୍ ଓ ଚା ଏବଂ ସୁଦରତ କେଉରଫାନ୍ ଅଛନ୍ତି। ଏହାଛଡ଼ା ୨୦୦୬ରେ ସାମରିକ ବିଦ୍ରୋହ ଦ୍ୱାରା କ୍ଷମତାଚ୍ୟୁତ ହୋଇଥିବା ପୂର୍ବତନ ପ୍ରଧାନମନ୍ତ୍ରୀ ତକ୍ସିନ୍ ସିନାୱାତ୍ରାଙ୍କ ଦଳ ମଧ୍ୟ ନିର୍ବାଚନରେ ଭାଗ ନେଉଛି। ଏବେ ସିନାୱାତ୍ରା ବିଦେଶରେ ସ୍ୱେଚ୍ଛାକୃତ ନିର୍ବାସନରେ ଅଛନ୍ତି। ଏହି ନିର୍ବାଚନରେ ପ୍ରାୟ ୫କୋଟି ଭୋଟର ମତଦାନ କରିବେ। ପୂର୍ବରୁ ସାମରିକ ସରକାର ୨୦୧୫ରେ ନିର୍ବାଚନ କରାଇବା ପାଇଁ କହିଥିଲେ ମଧ୍ୟ ସେଥିରୁ ଓହରି ଯାଇଥିଲେ।
