କେନ୍ଦ୍ର ବିରୋଧରେ ଟିଡିପି ଆଣିବ ଅନାସ୍ଥା ପ୍ରସ୍ତାବ

0

ନୂଆଦିଲ୍ଲୀ: ଚନ୍ଦ୍ରବାବୁ ନାଇଡ଼ୁଙ୍କ ନେତୃତ୍ୱାଧୀନ ତେଲୁଗୁ ଦେଶମ୍‍ ପାର୍ଟି(ଟିଡିପି) କେନ୍ଦ୍ର ସରକାରଙ୍କ ବିରୋଧରେ ସଂସଦର ଆସନ୍ତା ମୌସୁମୀ ଅଧିବେଶନରେ ଅନାସ୍ଥା ପ୍ରସ୍ତାବ ଆଣିବାକୁ ଯାଉଛି। ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ମାନ୍ୟତା ଦାବିକୁ କେନ୍ଦ୍ର ସରକାର ଅଗ୍ରାହ୍ୟ କରିବା ପରେ ଟିଡିପି ଏଭଳି ନିଷ୍ପତ୍ତି ନେଇଛି।
ଏକଦା କେନ୍ଦ୍ରର ଏନ୍‍ଡିଏ ସରକାରଙ୍କ ସହଯୋଗୀ ଥିବା ଚନ୍ଦ୍ରବାବୁ ନାଇଡ଼ୁ କହିଛନ୍ତି ଯେ ୨୦୧୪ରେ ଆନ୍ଧ୍ରପ୍ରଦେଶରୁ ଅଲଗା ହୋଇ ତେଲେଙ୍ଗାନା ରାଷ୍ଟ୍ର ଗଠନ ବେଳେ ଆନ୍ଧ୍ରପ୍ରଦେଶକୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲା। କିନ୍ତୁ ବିଜେପି ନେତୃତ୍ୱାଧୀନ କେନ୍ଦ୍ରର ଏନ୍‍ଡିଏ ସରକାର ସେହି ପ୍ରତିଶ୍ରୁତି ଏ ପର୍ଯ୍ୟନ୍ତ ପୂରଣ କରିନାହାନ୍ତି। ତେଣୁ କେନ୍ଦ୍ର ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଗତ କରାଯିବ। ଆସନ୍ତା ବର୍ଷ ଆନ୍ଧ୍ରପ୍ରଦେଶରେ ବିଧାନସଭା ନିର୍ବାଚନ ହେବାକୁ ଥିବା ବେଳେ ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରସଙ୍ଗରେ ୱାଇଏସ୍‍ଆର କଂଗ୍ରେସ ପକ୍ଷରୁ ଟିଡିପିକୁ ତୀବ୍ର ସମାଲୋଚନାର ସମ୍ମୁଖୀନ ହେବାକୁ ପଡ଼ୁଛି। ତେଣୁ ଆଗାମୀ ଅଧିବେଶନରେ କେନ୍ଦ୍ର ସରକାରଙ୍କ ବିରୋଧରେ ଚନ୍ଦ୍ରବାବୁ ନାଇଡ଼ୁ ଅନାସ୍ଥା ପ୍ରସ୍ତାବ ଆଗତ କରିବାକୁ ନିଷ୍ପତ୍ତି ନେଇଛନ୍ତି।
ସୂଚନାଯୋଗ୍ୟ, ଏଥିପୂର୍ବରୁ ମଧ୍ୟ ଜଗନମୋହନ ରେଡ୍ଡୀଙ୍କ ନେତୃତ୍ୱାଧୀନ ୱାଇଏସ୍‍ଆର କଂଗ୍ରେସ ସହଯୋଗରେ ଟିଡିପି କେନ୍ଦ୍ର ସରକାରଙ୍କ ବିରୋଧରେ ଅନାସ୍ଥା ପ୍ରସ୍ତାବ ପାଇଁ ନୋଟିସ୍‍ ଦେଇଥିଲା। କିନ୍ତୁ ଗୃହ ବାରମ୍ବାର ମୁଲତବୀ ହେବା ଯୋଗୁଁ ଅନାସ୍ଥା ପ୍ରସ୍ତାବ ଆଗତ ହୋଇ ପାରି ନ ଥିଲା। ଗତ ମାର୍ଚ୍ଚ ମାସରେ ଏନ୍‍ଡିଏ ସରକାରରୁ ନାଇଡ଼ୁ ସମର୍ଥନ ପ୍ରତ୍ୟାହାର କରିଥିଲେ।

Leave A Reply