ମୃତ୍ୟୁର ଘଣ୍ଟାଏ ପୂର୍ବରୁ ସାଲଭେଙ୍କୁ ୧ ଟଙ୍କା ନେଇଯିବାକୁ କହିଥିଲେ ସୁଷମା

ନୂଆଦିଲ୍ଲୀ: ମଙ୍ଗଳବାର ରାତିରେ ପୂର୍ବତନ ବୈଦେଶିକ ମନ୍ତ୍ରୀ ସୁଷମା ସ୍ବରାଜଙ୍କ ପରଲୋକ ଘଟିଛି। ମୃତ୍ୟୁ ପରେ ସୁଷମାଙ୍କୁ ସାରାଦେଶ ଝୁରୁଛି। ତେବେ ମୃତ୍ୟୁ ପୂର୍ବରୁ ସୁଷମାଙ୍କ କିଛି କଥାକୁ ନେଇ ସାରା ଦେଶରେ ଚର୍ଚ୍ଚା ଜୋର ଧରିଛି। ମୃତ୍ୟୁର ୧ଘଣ୍ଟା ପୂର୍ବରୁ ସେ ବରିଷ୍ଠ ଓକିଲ ହରିଶ ସାଲଭେଙ୍କୁ ତାଙ୍କର ୧ ଟଙ୍କା ଫିସ୍‌ ନେଇଯିବାକୁ କହିଥିଲେ। ସାଲ୍‌​‌ଭେ ପାକିସ୍ତାନରେ ବନ୍ଦୀ ଥିବା କୁଳଭୂଷଣ ଯାଦବ ମାମଲାରେ ଅନ୍ତର୍ଜାତୀୟ ନ୍ୟାୟିକ ଅଦାଲତରେ ଭାରତ ପକ୍ଷରୁ ଲଢ଼ିଥିଲେ। ଏହି ମାମଲା ଲଢ଼ିବା ପାଇଁ ସେ ୧ ଟଙ୍କା ଫିସ ନେବେ ବୋଲି କହିଥିଲେ। ତେଣୁ ସୁଷମା ତାଙ୍କୁ ତାଙ୍କର ୧ ଟଙ୍କା ନେଇଯିବାକୁ ଡାକିଥିଲେ। କାଲି ଆସି ୧ ଟଙ୍କା ନେଇଯିବାକୁ ସାଲ୍‌ଭେଙ୍କୁ କହିଥିଲେ। କିନ୍ତୁ ଏହା ପୂର୍ବରୁ ସେ ତାଙ୍କ ଶେଷ ନିଃଶ୍ଵାସ ତ୍ୟାଗ କରିଥିଲେ। ସାଲ୍‌ଭେ ଏହି ବିଷୟ ପ୍ରକାଶ କରିବା ପରେ ଦେଶବାସୀ ଭାବବିହ୍ବଳ ହୋଇପଡ଼ିଛନ୍ତି।