କଟକ: ସାରସ୍ୱତ ଜଗତରେ ଉତ୍ସାହ ଓ ଆଲୋଡ଼ନ ସୃଷ୍ଟି କରିଥିବା ତଥା ଶୈଶବରେ ଥିବା ‘ଗୋପବନ୍ଧୁଙ୍କ ସତ୍ୟବାଦୀ’ର ବାର୍ଷିକ ସମାରୋହରେ ଓଡ଼ିଶାର ଜଣେ କୃତୀ ସାରସ୍ୱତ ସାଧକ ଓ ପ୍ରତିଭାଙ୍କୁ ସମ୍ମାନିତ କରିବା ପାଇଁ ‘ସତ୍ୟବାଦୀ ସାରସ୍ୱତ ସମ୍ମାନ’ ବ୍ୟବସ୍ଥା କରାଯାଇଛି। ଏଥିନିମନ୍ତେ ଗଠିତ ବିଚାରକ ମଣ୍ଡଳୀର ବୈଠକ ଆଜି ଗୋପବନ୍ଧୁ ଭବନରେ ଅନୁଷ୍ଠିତ ହୋଇଯାଇଛି। ବହୁ ବିଚାର ବିମର୍ଶ ଓ ଆଲୋଚନା ପରେ ଓଡ଼ିଶାର ସାରସ୍ୱତ ଜଗତର ଜଣେ ପ୍ରତିଷ୍ଠିତା ଓ ପ୍ରବୀଣା ସାରସ୍ୱତ ସାଧିକା ଡ. ଅର୍ଚ୍ଚନା ନାୟକଙ୍କ ନାମ ସର୍ବସମ୍ମତିକ୍ରମେ ବିଚାରକମଣ୍ଡଳୀ ଦ୍ୱାରା ମନୋନୀତ ହୋଇଥିଲା।
ଏହି ସମ୍ମାନ ଆସନ୍ତା ଏପ୍ରିଲ ୧ ତାରିଖ ଦିନ ‘ଗୋପବନ୍ଧୁଙ୍କ ସତ୍ୟବାଦୀ’ର ବାର୍ଷିକ ସମାରୋହ ଉତ୍ସବରେ ପ୍ରଦାନ କରାଯିବ। ଏଥିରେ ଦକ୍ଷିଣା ବାବଦରେ ୧ ଲକ୍ଷ ଟଙ୍କା ପ୍ରଦାନ କରାଯିବାର ବ୍ୟବସ୍ଥା ରହିଛି।
