ମାଲେସିଆ ମାଷ୍ଟର୍ସ : ସେମିରେ ସାଇନା ପରାସ୍ତ
କୁଆଲାଲମ୍ପପୁର : ଏଠାରେ ଖେଳାଯାଉଥିବା ମାଲେସିଆ ମାଷ୍ଟର୍ସ ବ୍ୟାଡମିଣ୍ଟନ୍ ଟୁର୍ଣ୍ଣାମେଣ୍ଟର ମହିଳା ସିଙ୍ଗଲ୍ସ ସେମିରେ ପରାସ୍ତ ହୋଇଛନ୍ତି ଭାରତର ସାଇନା ନେହୱାଲ୍। ଶନିବାର ଖେଳାଯାଇଥିବା ସେମିଫାଇନାଲରେ ସାଇନାଙ୍କୁ ଅଲିମ୍ପିକ୍ସ ଏବଂ ବିଶ୍ବ ଚମ୍ପିଆନ୍ ସ୍ପେନର କାରୋଲିନା ମାରିନ୍ ସିଧାସଳଖ ୧୬-୨୧, ୧୩-୨୧ ଗେମ୍ରେ ପରାସ୍ତ କରିଥିଲେ। ପ୍ରଥମ ଗେମ୍ରେ ସାଇନା ମୂଳରୁ ଭଲ ପ୍ରଦର୍ଶନ କରିବା ସହ ୪ର୍ଥ ସିଡ୍ ମାରିନ୍ଙ୍କୁଠାରୁ ଅଗ୍ରଣୀ ହାସଲ କରିଥିଲେ। ଏକଦା ସାଇନା ୫-୨ ପଏଣ୍ଟରେ ଆଗୁଆ ରହିଥିଲେ। ତେବେ ମଧ୍ୟାନ୍ତର ବେଳକୁ ମାରିନ୍ ୧୧-୯ ପଏଣ୍ଟରେ ଆଗୁଆ ରହିଥିଲେ। ପରବର୍ତ୍ତୀ ସମୟରେ ମାରିନା ଆକ୍ରମଣାତ୍ମକ ପ୍ରଦର୍ଶନ କରି ପ୍ରଥମ ଗେମ୍ ଜିତି ନେଇଥିଲେ। ଦ୍ବିତୀୟ ଗେମ୍ରେ ମାରିନ ମୂଳରୁ ଭଲ ପ୍ରଦର୍ଶନ କରିବା ସହ ୬-୧ ପଏଣ୍ଟରେ ଆଗୁଆ ରହିଥିଲେ। ମଧ୍ୟାନ୍ତର ବେଳକୁ ମାରିନ ୧୧-୬ ପଏଣ୍ଟରେ ଅଗ୍ରଣୀ ହାସଲ କରିବାକୁ ସକ୍ଷମ ହୋଇଥିଲେ। ଗେମ୍କୁ ଫେରିବାକୁ ସାଇନା ବହୁ ଚେଷ୍ଟା କରିଥିଲେ ମଧ୍ୟ ମାରିନ ତାଙ୍କୁ ସେ ସୁଯୋଗ ଦେଇନଥିଲେ। ମାରିନ୍ ଭଲ ପ୍ରଦର୍ଶନ ବଜାୟ ରଖି ଦ୍ବିତୀୟ ଗେମ୍କୁ ମଧ୍ୟ ଜିତି ଫାଇନାଲରେ ପ୍ରବେଶ କରିଥିଲେ।