ସ୍ବାମୀଙ୍କ ଅନୁପସ୍ଥିତିରେ ଅନ୍ୟତ୍ର ବିବାହ କଲେ ସ୍ତ୍ରୀ
ରାଉରକେଲା: ବିବାହ ପରି ଏକ ପବିତ୍ର ସମ୍ପର୍କରେ ପୁଣି ଲାଗିଛି କଳଙ୍କ । ସ୍ବାମୀ ଘରେ ନ ଥିବାର ସୁଯୋଗ ନେଇ ଅନ୍ୟ ଜଣଙ୍କୁ ବିବାହ କରିଛନ୍ତି ସ୍ତ୍ରୀ । ଏଭଳି ଲଜ୍ୟାଜନକ ଘଟଣା ପୁଣି ରାଉରକେଲାର ବନ୍ଧମୁଣ୍ଡାରେ ଘଟିଛି । ଏବେ ନ୍ୟାୟ ଦାବିକରୁଛନ୍ତି ପ୍ରଥମ ସ୍ୱାମୀ ।
ସୂଚନାଯୋଗ୍ୟ, ବିହାରର ମୂଳ ବାସିନ୍ଦା ମନଜଂୟ ଚୌବେ ୨୦୧୬ରେ ରାଉରକେଲାର ଜଣେ ଓଡିଆ ଯୁବତୀଙ୍କୁ ପ୍ରେମ ବିବାହ କରିଥିଲେ । ଏହି ବିବାହକୁ ପରିବାର ଲୋକ ଗ୍ରହଣ କରିନଥିବାରୁ ସେମାନେ କୋର୍ଟରେ ବିବାହ କରି ବୈବାହିକ ଜୀବନ ବିତାଉଥିଲେ । କିନ୍ତୁ ହଠାତ୍ ଭାଙ୍ଗିଗଲା ସୁଖ ସଂସାର । ମନଜଂୟ ଚୌବେ ଘରେ ନଥିବା ବେଳେ ତାଙ୍କ ପତ୍ନୀ ଅନ୍ୟ ଜଣେ ଯୁବକଙ୍କୁ ବିବାହ କରିଥିବା ନେଇ ଅଭିଯୋଗ ହୋଇଛି ।
ଗତ ୨୨ ତାରିଖରେ କୌଣସି କାର୍ଯ୍ୟରେ ସେ ବନାରସ ଯାଇଥିବା ବେଳେ ତାଙ୍କ ସ୍ତ୍ରୀ ବାପଘରକୁ ଯାଇଥିଲେ । ସେମାନେ କିଛି ଦିନ ଫୋନରେ କଥା ହେଉଥିଲେ କିନ୍ତୁ ମାର୍ଚ ୧ ତାରିଖରୁ ତାଙ୍କ ସ୍ତ୍ରୀ ଫୋନ୍ ଉଠାଉ ନ ଥିଲେ । ଶେଷରେ ଝିଅର ମାଙ୍କୁ ଫୋନ୍ କରିବାରୁ ସେ ଜାଣିବାକୁ ପାଇଥିଲେ ଯେ ତାଙ୍କ ସ୍ତ୍ରୀ ଅନ୍ୟ ଜଣଙ୍କୁ ବିବାହ କରିଛନ୍ତି । ମନଜଂୟ ଚୌବେ ସେଠାରେ ପହଞ୍ଚି ବିବାହ ଫଟୋ ଓ ସାର୍ଟିଫିକେଟ ଦେଖାଇବା ସହ ଏନେଇ ଥାନାରେ ଅଭିଯୋଗ କରିଛନ୍ତି । ମାତ୍ର ଥାନାରେ ପ୍ରଥମେ କେହି ତାଙ୍କ କଥା ଶୁଣି ନ ଥିବା ସେ ପ୍ରକାଶ କରିଥିଲେ । ଏହାପରେ ସେ ଗଣ ମାଧ୍ୟମର ସହାୟତା ନେଇଥିଲେ । ପୁଲିସ ଏହାପରେ ଘଟଣାର ତଦନ୍ତ ଆରମ୍ଭ କରିଛି ।