ସିବିଆଇ ତଦନ୍ତ ପାଇଁ ପ୍ରାର୍ଥନା

ହାଇକୋର୍ଟରେ କୁନ୍ଦୁଲି ପୀଡ଼ିତାଙ୍କ ମାଆ

କଟକ  : କୁନ୍ଦୁଲି ପୀଡିତାଙ୍କ ମା’ ଦାମାଇ ଛତି ନ୍ୟାୟ ପାଇଁ ଶେଷରେ ହାଇକୋର୍ଟଙ୍କ ଦ୍ୱାରସ୍ଥ ହୋଇ ଏକ ମାମଲା ରୁଜୁ କରିଛନ୍ତି। ଗଣଦୁଷ୍କର୍ମ ଘଟଣା ସହ ପୀଡିତାଙ୍କ ମୃତ୍ୟୁର ସ୍ୱଚ୍ଛ ଓ ନିରପେକ୍ଷ ତଦନ୍ତ କରିବା ପାଇଁ ପ୍ରାର୍ଥନା କରି ହାଇକୋର୍ଟରେ ସେ ମାମଲା ରୁଜୁ କରିଛନ୍ତି।

ପୀଡିତାଙ୍କ ସହିତ ଗଣଦୁଷ୍କର୍ମ ଅଭିଯୋଗ ନେଇ କୋରାପୁଟ ଜିଲ୍ଲାର ପଟ୍ଟାଙ୍ଗୀ ଥାନାରେ ଆଇପିସିର ଦଫା ୩୭୫-ଡି, ୩୭୭ ଓ ପୋକ୍‌ସୋ ଆକ୍ଟ ୨୦୧୨ର ଧାରା ୬ରେ ରୁଜୁ ମାମଲାର ତଦନ୍ତଭାର ସିବିଆଇକୁ ଦିଆଯାଉ ବୋଲି ପ୍ରାର୍ଥନା କରିଛନ୍ତି। କ୍ରାଇମବ୍ରାଞ୍ଚରୁ ଏହି ଘଟଣାର ତଦନ୍ତ ଭାର କାଢିନିଆ ଯାଇ ଭୁବନେଶ୍ୱର ସିବିଆଇ ଏସପିଙ୍କୁ ଗ୍ରହଣ କରିବା ପାଇଁ ନିର୍ଦ୍ଦେଶ ଦିଆଯାଉ ବୋଲି ଆବେଦନପତ୍ରରେ ଉଲ୍ଲେଖ କରିଛନ୍ତି। ସେ ଆବେଦନପତ୍ରରେ ଉଲ୍ଲେଖ କରିଛନ୍ତି ଯେ ତାଙ୍କ ପରିବାର ପ୍ରତି ବିପଦ ରହିଛି। ଏପରି ପରିସ୍ଥିିତିରେ ପରିବାରକୁ ସୁରକ୍ଷା ପ୍ରଦାନ କରିବା ପାଇଁ ନିର୍ଦ୍ଦେଶ ଦିଆଯାଉ ବୋଲି ସେ ହାଇକୋର୍ଟରେ ଦାଖଲ କରିଥିବା ରିଟ୍‌ ଆବେଦନରେ ଦର୍ଶାଇଛନ୍ତି।