ଜେଏନୟୁ ଅଶାନ୍ତ; ୧୪୪ ଧାରା ସତ୍ତ୍ବେ ସଂସଦ ଅଭିମୁଖେ ବିକ୍ଷୋଭ ଶୋଭାଯାତ୍ରାରେ ବାହାରିଲେ ଶତାଧିକ ଛାତ୍ର

ନୂଆଦିଲ୍ଲୀ: ଜବାହରଲାଲ ନେହେରୁ ବିଶ୍ଵବିଦ୍ୟାଳୟ(ଜେଏନୟୁ)ରେ ପୁଣି ଥରେ ଛାତ୍ର ଅଶାନ୍ତି ଦେଖାଦେଇଛି। ଫି ବୃଦ୍ଧି ଏବଂ ହଷ୍ଟେଲ ପାଇଁ ଲାଗୁ ହୋଇଥିବା ନିୟମକୁ ବିରୋଧ କରି ଛାତ୍ରମାନେ ରାସ୍ତାକୁ ଓହ୍ଲାଇଛନ୍ତି। ଛାତ୍ର ସଂଘ ନେତୃତ୍ଵରେ ଶହ ଶହ ଛାତ୍ରଛାତ୍ରୀ ସୋମବାର ସଂସଦ ଅଭିମୁଖେ ବିକ୍ଷୋଭ ଶୋଭାଯାତ୍ରାରେ ବାହାରିଛନ୍ତି। କ୍ୟାମ୍ପସ ବାହାରେ ପ୍ରଶାସନ ପକ୍ଷରୁ ୧୪୪ ଧାରା ଲାଗୁ କରାଯାଇଥିଲେ ହେଁ ଛାତ୍ରମାନେ ଏକତ୍ର ହୋଇ ସଂସଦ ଅଭିମୁଖେ ଯାତ୍ରା ଆରମ୍ଭ କରିଛନ୍ତି। ଛାତ୍ରମାନଙ୍କୁ ସଂସଦ ପରିସରରେ ପହଞ୍ଚିବାକୁ ଦିଆଯିବ ନାହିଁ ବୋଲି ପୁଲିସ କହିବା ସହିତ ବିଭିନ୍ନ ସ୍ଥାନରେ ଛାତ୍ରଙ୍କୁ ଅଟକାଇବା ଲାଗି ବ୍ୟାରିକେଡ୍‌ କରାଯାଇଛି। କିନ୍ତୁ ଅନେକ ସ୍ଥାନରେ ଛାତ୍ରମାନେ ବ୍ୟାରିକେଡ୍‌ ଭାଙ୍ଗି ଦେଇଛନ୍ତି।

ଅନ୍ୟପଟେ ସୋମବାରଠାରୁ ସଂସଦର ଶୀତକାଳୀନ ଅଧିବେଶନ ଆରମ୍ଭ ହୋଇଥିବାରୁ ଛାତ୍ରମାନଙ୍କୁ ଅଟକାଇବା ପୁଲିସ ପାଇଁ ଚ୍ୟାଲେଞ୍ଜ ପାଲଟିଛି। ଜେଏନୟୁ କ୍ୟାମ୍ପସଠାରୁ ୧ କିଲୋମିଟର ଅଞ୍ଚଳ ଭିତରେ ଛାତ୍ରଙ୍କୁ ଅଟକାଇବାକୁ ପୁଲିସ ଯୋଜନା କରିଥିଲେ ହେଁ ତାହା ବିଫଳ ହୋଇଛି। ସଂସଦ ପରିସରରେ ସୁରକ୍ଷା ବ୍ୟବସ୍ଥା ପାଇଁ ଦିଲ୍ଲୀ ପୁଲିସ ପକ୍ଷରୁ ୯ କମ୍ପାନୀ ଫୋର୍ସ ମୁତୟନ କରାଯାଇଛି। ସେଥିରେ ଅର୍ଦ୍ଧସାମରିକ ବଳ ମଧ୍ୟ ସାମିଲ ହୋଇଛନ୍ତି। ପାଖାପାଖି ୧୨୦୦ ପୁଲିସ କର୍ମଚାରୀ ସୁରକ୍ଷା ବ୍ୟବସ୍ଥାରେ ନିୟୋଜିତ ହୋଇଛନ୍ତି।