ଦେଶର ସର୍ବକନିଷ୍ଠ ସହିଦ - ବାଜି ରାଉତ

ଦେଶର ସର୍ବକନିଷ୍ଠ ସହିଦ - ବାଜି ରାଉତ

Copy Editor RKD | Published On: Oct 11, 2017 12:42 AM IST | Updated On: Oct 11, 2017 12:49 AM IST |   1975

କଟକ : ଓଡିଶା ଇତିହାସରେ ଅକ୍ଟୋବର ୧୧ ତାରିଖ ଚିରଦିନ ପାଇଁ ଅଭୁଲା ହୋଇ ରହିଛି ଓ ରହିବ । ଏହି ଦିନରେ ୭୯ ବର୍ଷ ପୂର୍ବେ ଇଂରେଜଙ୍କ ଗୁଳିରେ ପ୍ରାଣ ହରାଇଥିଲେ ଦେଶର ସର୍ବକନିଷ୍ଠ ସ୍ୱାଧୀନତା ସଂଗ୍ରାମୀ ବାଜି ରାଉତ । ମାତ୍ର ୧୨ ବର୍ଷ ବୟସରେ ସେ ଦେଶ ମାତୃକା ପାଇଁ ଜୀବନ ବଳିଦାନ ଦେଇ ଜନମାନସରେ ଅମର ହୋଇ ରହିଛନ୍ତି । ୧୯୩୮ ମସିହା,ଅକ୍ଟୋବର ୧୧ ତାରିଖରେ ଢେଙ୍କାନାଳ ଜିଲ୍ଲା ନୀଳକଣ୍ଠପୁର ଗ୍ରାମରେ ବାଜି ରାଉତଙ୍କୁ ଗୁଳି କରି ହତ୍ୟା କରିଥିଲେ ଇଂରେଜ ସିପାହି । ଏହାସହ ସେ ଦେଶର ସର୍ବକନିଷ୍ଠ ସହିଦର ମାନ୍ୟତା ପାଇବା ସହ ସବୁଦିନ ଅମର ହୋଇ ରହିଯାଇଛନ୍ତି । ତାଙ୍କର ଏହି ବଳିଦାନ ଦେଶରେ ସ୍ୱାଧୀନତା ସଂଗ୍ରାମକୁ ଅଧିକ ପ୍ରଜ୍ୱଳିତ କରିବାରେ ସହାୟକ ହୋଇଥିଲା । ଇତିହାସ ପୃଷ୍ଠାକୁ ଅବଲୋକନ କଲେ ଜଣାପଡେ ୧୯୩୮, ଅକ୍ଟୋବର ୧୦ ତାରିଖରେ ଇଂରେଜ ପୁଲିସ କିଛି ଲୋକଙ୍କୁ ଗିରଫ କରି ଭୁବନ ଗ୍ରାମକୁ ନେଇଥିଲେ । ସେମାନଙ୍କୁ ମୁକ୍ତ କରିବା ଦାବି କ୍ରମେ ସେହି ଅଞ୍ଚଳରେ ତୀବ୍ର ହୋଇଥିଲା । ଇଂରେଜଙ୍କ ବିରୋଧରେ ସ୍ଥାନୀୟ ଲୋକଙ୍କ ଆକ୍ରୋଶ ଏତେ ମାତ୍ରାରେ ବଢି ଯାଇଥିଲା ଯେ,ତାକୁ ନିୟନ୍ତ୍ରଣ କରିବାକୁ ଇଂରେଜ ପୁଲିସ ଲୋକଙ୍କ ଉପରକୁ ଗୁଳି ଚଳାଇଥିଲେ । ସେଥିରେ ଦୁଇ ଜଣଙ୍କ ମୃତ୍ୟୁ ହୋଇଯାଇଥିଲା । ତେବେ ଲୋକଙ୍କ ଆକ୍ରୋଶ ଧିରେ ଧିରେ ବଢୁଥିବା ଦେଖୁ ପୁଲିସ ମାନେ ବ୍ରାହ୍ମଣୀ ନଦୀ ପାର ହୋଇ ଢେଙ୍କାନାଳ ପଳାଇ ଯିବାକୁ ଚେଷ୍ଟା କରିଥିଲେ । ଏହାପରେ ସେମାନେ ଅକ୍ଟୋବର ୧୧ ତାରିଖରେ ବର୍ଷାରେ ଭିଜିଭିଜି ବ୍ରାହ୍ମଣୀ ନଦୀର ନୀଳକଣ୍ଠପୁର ଘାଟରେ ପହଞ୍ଚିଥିଲେ । ସେହି ସମୟରେ ନଦୀ ଅପରପାଶ୍ୱର୍ କୂଳରେ ଡଙ୍ଗା ସହ ବସିଥିବା ବାଜି ରାଉତକୁ ନଦୀ ପାର କରିଦେବାକୁ ସେମାନେ କହିଥିଲେ । ବାଜି ରାଉତଙ୍କୁ ସମସ୍ତ ଘଟଣା ସମ୍ପର୍କରେ ସୂଚନା ଥିଲା ଏବଂ ସେ ଇଂରେଜଙ୍କ ବର୍ବରକାଣ୍ଡ ଏବଂ ଅତ୍ୟାଚାର ସମ୍ପର୍କରେ ଶୁଣିଥିଲେ । ତେଣୁ ସେ ଇଂରେଜ ସୈନିକଙ୍କୁ ନଦୀ ପାର କରିବାକୁ ମନା କରି ଦେଇଥିଲେ । ବାରମ୍ବାର କହିବା ସତ୍ତ୍ୱେ ସେ ଇଂରେଜ ସୈନିକଙ୍କ କଥା ଶୁଣିନଥିଲେ । ଏହାପରେ ଇଂରେଜ ସୈନିକମାନେ ବାଳକ ବାଜି ରାଉତଙ୍କ ଉପରକୁ ଗୁଳି ଚଳାଇ ଦେଇଥିଲେ । ଇଂରେଜଙ୍କ ଗୁଳିରେ ନିଷ୍ପାପ ବାଳକ ବାଜି ରାଉତଙ୍କ ପ୍ରାଣ ଚାଲିଯାଇଥିଲା । ଏହାଛଡା ଇଂରେଜଙ୍କ ଗୁଳିରେ ଲକ୍ଷ୍ମଣ ମଲ୍ଲିକ, ହୁରୁଷି ପ୍ରଧାନ, ନଟ ମଲ୍ଲିକ, ରଘୁ ନାୟକ, ଗୁରୀ ନାୟକଙ୍କ ମୃତ୍ୟୁ ହୋଇଥିଲା ଏବଂ ଅନେକ ଲୋକ ଗୁରୁତର ଆହତ ହୋଇଥିଲେ । ଇଂରେଜଙ୍କ ଗୁଳିରେ ଆହତ ହୋଇଥିବା ଫଗୁ ସାହୁ ଏବଂ ପାଣୁ ଲେଙ୍କାଙ୍କ କଟକ ଡାକ୍ତରଖାନାରେ ମୃତ୍ୟୁ ହୋଇଥିଲା । ଏହି ବାଳକଙ୍କ ବଳିଦାନର ଗାଥା ସାରା ଦେଶରେ ପ୍ରଚାରିତ ହୋଇଥିଲା ଏବଂ ଲୋକଙ୍କ ମନରେ ଏକ ନୂତନ ଉତ୍ସାହ ଏବଂ ଉନ୍ମାଦନା ଭରି ଦେଇଥିଲା । ଇଂରେଜମାନଙ୍କ ବିରୋଧରେ ସଂଗ୍ରାମ କରୁଥିବା ଲୋକଙ୍କ ଉତ୍ସାହ ମଧ୍ୟ ଦ୍ୱିଗୁଣିତ ହୋଇଥିଲା । ସହିଦ ବାଜି ରାଉତଙ୍କ ଶେଷକୃତ୍ୟ ଖାନନଗରରେ କରାଯାଇଥିଲା । ଦେଶର ସର୍ବକନିଷ୍ଠ ସହିଦ ବାଜି ରାଉତଙ୍କୁ ସମ୍ମାନ ଜଣାଇ ମୁମ୍ବାଇ ଆଇଆଇଟିରେ ଓଡିଆ ଛାତ୍ର ସଂଘ ପକ୍ଷରୁ ବାଜି ରାଉତ ସମ୍ମାନ ପ୍ରଦାନ କରାଯାଉଛି । ଏହାଛଡା ବର୍ତ୍ତମାନର ଅନୁଗୁଳ ଜିଲ୍ଲାରେ ବାଜି ରାଉତ ଛାତ୍ରାବାସ ଏବଂ ବିଦ୍ୟାଳୟ ମଧ୍ୟ ସକ୍ରିୟ ରହିଛି । ଇତିହାସ କହେ ବାଜି ରାଉତ ସହିଦ ହେବାପରେ ତାଙ୍କ ବୀରଗାଥା ଅନେକଙ୍କ ହୃଦୟକୁ ଆନ୍ଦୋଳିତ କରିଥିଲା । ସେହି ସମୟରେ ଓଡିଶାରେ ସ୍ୱାଧୀନତା ସଂଗ୍ରାମର ନେତୃତ୍ୱ ନେଉଥିବା ସେନାନୀଙ୍କ ମଧ୍ୟରୁ ମାଳତୀ ଚୌଧୁରୀ ୧୯୪୬, ମେ ୧୩ ତାରିଖରେ ଏହି ଛାତ୍ରାବାସ ଏବଂ ବିଦ୍ୟାଳୟକୁ ଆରମ୍ଭ କରିଥିଲେ । ସେ କଟକ ଜେଲରେ ଥିବାବେଳେ ସ୍ୱାଧୀନତା ସଂଗ୍ରାମୀଙ୍କ ପରିବାର, ପିଲାଛୁଆଙ୍କ ବିଷୟରେ ଚିନ୍ତିତ ହୋଇ ପଡିଥିଲେ । ସେ ଜେଲରୁ ବାହାରିବା ପରେ ଏହି ଛାତ୍ରାବାସ କରିବାକୁ ନିଷ୍ପତ୍ତି ନେଇଥିଲେ । ଏଠାରେ ସ୍ୱାଧୀନତା ସଂଗ୍ରାମୀଙ୍କ ପୁଅ ଝିଅ ତଥା ଦଳିତ ଓ ଆଦିବାସୀ ଛାତ୍ରଛାତ୍ରୀଙ୍କୁ ରହିବାର ସୁଯୋଗ ମିଳିଥିଲା । ଏହି କାର୍ଯ୍ୟରେ ତାଙ୍କୁ ସେହି ସମୟର ଅନେକ ସ୍ୱାଧୀନତା ସଂଗ୍ରାମୀ ସ୍ୱତଃସ୍ଫୁର୍ତ୍ତ ଭାବରେ ସହଯୋଗ କରିଥିଲେ । ବର୍ତ୍ତମାନ ଏହି ଛାତ୍ରାବାସରେ ୧୬୫ ଜଣ ଛାତ୍ରଛାତ୍ରୀ ରହି ପାଠ ପଢୁଛନ୍ତି ।
Tags:

Like Us

Breaking News

ମୋହାଲି : ଆଜି (ବୁଧବାର) ଭାରତ-ଶ୍ରୀଲଙ୍କା ୨ୟ ଦିନିକିଆ ମ୍ୟାଚ୍‌ ସି ପ୍ଲେନରେ ଯାତ୍ରା କରି  ନିର୍ବାଚନ ପ୍ରଚାର କଲେ ମୋଦି ମନ୍ଦିର ଯିବା କ’ଣ ଭୂଲ: ବିଜେପିକୁ ପ୍ରଶ୍ନ ପଚାରିଲେ ରାହୁଲ ଗାନ୍ଧୀ ପାରିଦୀପ ତୈଳ ବିଶୋଧନାଗାରରେ ଅଗ୍ନିକାଣ୍ଡ