ଭାରତ ସହ ସମ୍ପର୍କ କାଟିବା ପଡ଼ିଲା ମହଙ୍ଗା, ପାକିସ୍ତାନରେ ଔଷଧ ଓ କଞ୍ଚାମାଲ ସଂକଟ

ନୂଆଦିଲ୍ଲୀ : ଜାମ୍ମୁ କାଶ୍ମୀରରୁ ଧାରା ୩୭୦ ଉଚ୍ଛେଦକୁ ବିରୋଧ କରି ଭାରତ ସହ ଦ୍ୱିପାକ୍ଷିକ ବାଣିଜ୍ୟ ସମ୍ପର୍କ କାଟିବା ନିଷ୍ପତ୍ତି ପାକିସ୍ତାନକୁ ମହଙ୍ଗା ପଡ଼ିଛି। ଏବେ ପାକିସ୍ତାନରେ ଜୀବନରକ୍ଷକ ଔଷଧ ତଥା ଅନ୍ୟ ଆବଶ୍ୟକ ସାମଗ୍ରୀର ସଂକଟ ଦେଖାଦେଇଛି। ଫଳରେ ପାକିସ୍ତାନର ଏକ ଉଦ୍ୟୋଗ ସଂଗଠନ ସରକାରଙ୍କୁ ଆମଦାନୀ ନିୟମକୁ କୋହଳ କରିବା ପାଇଁ ନବେଦନ କରିଛି।

ପାକିସ୍ତାନର ଖବରକାଗଜ ‘ଡନ’ ଅନୁସାରେ ଉଦ୍ୟୋଗ ସଂଗଠନ ଏମ୍ପଲାୟର୍ସ ଫେଡେରସନ ଅଫ ପାକିସ୍ତାନ (ଇଏଫପି) ଭାରତ ସହ ଦ୍ୱିପାକ୍ଷିକ ବାଣିଜ୍ୟ ସମ୍ପର୍କ ଚ୍ଛିନ୍ନ ନିଷ୍ପତ୍ତିକୁ ସମାଲୋଚନା କରିଛି। ଇଏଫପି ପକ୍ଷରୁ କୁହାଯାଇଛି ଯେ ବିକଳ୍ପ ବ୍ୟବସ୍ଥା ନକରି ଏଭଳି ନିଷ୍ପତ୍ତି ଦ୍ୱାରା ପାକିସ୍ତାନର କ୍ଷତି ହେବ। ଆଉ କିଛି ଦିନ ପରେ ପାକିସ୍ତାନ ବଜାରରେ ଜୀବନ ରକ୍ଷକ ଔଷଧ ମିଳିବ ନାହିଁ। ତେଣୁ ତୁରନ୍ତ ବିକଳ୍ପ ବ୍ୟବସ୍ଥା କରାଯାଉ। ନଚେତ ଆମଦାନୀ ନିୟମରେ କୋହଳ କରାଯିବା ଆବଶ୍ୟକ। ଇଏଫପି ଉପାଧ୍ୟକ୍ଷ ଜାକି ଅହମଦ ଖାନ କହିଛନ୍ତି ଯେ ଜୀବନରକ୍ଷକ ଔଷଧ ତିଆରି କରିବା ପାଇଁ ପାକିସ୍ତାନର ଔଷଧ କମ୍ପାନୀ ଭାରତରୁ କେତେକ ସାମଗ୍ରୀ ଆମଦାନୀ କରିଥାନ୍ତି। ଏବେ ବାଣିଜ୍ୟ ସମ୍ପର୍କ କଟିଯାଇଥିବାରୁ ଔଷଧ ତିଆରି ପାଇଁ କଞ୍ଚାମାଲ ମିଳୁନାହିଁ। ଅଳ୍ପଦିନରେ ବଜାରରେ ଥିବା ଜୀବନ ରକ୍ଷକ ଔଷଧ ସରିଯିବ। ଏହାପରେ ଦେଶରେ ଔଷଧର ସଂକଟ ଦେଖାଯିବ ଓ ଜୀବନ ହାନି ଘଟିବ। ବିକଳ୍ପ ବ୍ୟବସ୍ଥା ନକରିବା ପର୍ଯ୍ୟନ୍ତ ଆମଦାନୀ ନିୟମ କୋହଳ କରାଯାଉ।