ନୂଆଦିଲ୍ଲୀ: ରାଷ୍ଟ୍ରପତି ରାମନାଥ କୋବିନ୍ଦ୍ ଶନିବାର ରାଷ୍ଟ୍ରପତି ଭବନରେ ଅନୁଷ୍ଠିତ ସମାରୋହରେ ଓଡ଼ିଶାର ୩ ଜଣଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିଛନ୍ତି। ସେମାନେ ହେଉଛନ୍ତି କେନ୍ଦୁଝରର ଦୈତାରୀ ନାୟକ, କୋରାପୁଟ ଜିଲ୍ଲାର କମଳା ପୂଜାରୀ ଏବଂ କଟକର ଡି. ପ୍ରକାଶ ରାଓ।
ସମାଜ ସେବାରେ ଉଲ୍ଲେଖନୀୟ ଅବଦାନ ପାଇଁ କେନ୍ଦୁଝରର ଦୈତାରୀ ନାୟକଙ୍କୁ ପୁରସ୍କୃତ କରାଯାଇଛି। କେନ୍ଦୁଝର ଜିଲ୍ଲା ବାଂଶପାଳ ବ୍ଲକ ତଳବୈତରଣୀ ଗାଁର ଚାଷୀ ୭୫ ବର୍ଷୀୟ ଦୈତାରୀ ପାହାଡ଼ କାଟି କ୍ଷେତକୁ ପାଣି ଯୋଗାଇବାରେ ସଫଳ ହୋଇଥିଲେ। ଜଳସେଚନ ଅଭାବରୁ ସେହି ଅଞ୍ଚଳରେ ଚାଷ କାର୍ଯ୍ୟ ବାଧାପ୍ରାପ୍ତ ହେଉଥଲା ତେଣୁ ସେ ଗୋନାଶିକା ପର୍ବତରୁ ଏକ କେନାଲ ଖୋଳି ଜଳସେଚନର ସୁବିଧା କରାଇଥିଲେ। ଏଥିପାଇଁ ତାଙ୍କୁ ଅନେକ ପ୍ରଶଂସା ମିଳିଥିଲା।
କୋରାପୁଟର କମଳା ପୂଜାରୀଙ୍କୁ କୃଷି କ୍ଷେତ୍ରରେ ଅବଦାନ ଲାଗି ପଦ୍ମଶ୍ରୀ ପୁରସ୍କାର ପ୍ରଦାନ କରାଯାଇଛି। ଦିନେ କେହି ବିଶ୍ୱ କରି ନଥିଲେ ଯେ ମୁଖ୍ୟମନ୍ତ୍ରୀ ନବୀନ ପଟନାୟକ କମଳା ପୂଜାରୀଙ୍କୁ ରାଜ୍ୟ ଯୋଜନା ବୋର୍ଡର ସଦସ୍ୟ ମନୋନୀତ କରିବେ। କୋରାପୁଟ ଭଳି ଆଦିବାସୀ ବହୁଳ ଜିଲ୍ଲାରେ କମଳା ପୂଜାରୀ ଜୈବିକ କୃଷିକୁ ଆପଣେଇଥିଲେ ଓ ଅନ୍ୟମାନଙ୍କୁ ମଧ୍ୟ ପ୍ରବର୍ତ୍ତାଇ ପାରିଥିଲେ।
୬୧ ବର୍ଷୀୟ କଟକର ଡି. ପ୍ରକାଶ ରାଓ ଚା’ ଦୋକନ କରି ପରିବାର ଚଳାନ୍ତି। ମାତ୍ର ୬ ବର୍ଷ ବୟସରୁ ନିଜ ବାପାଙ୍କୁ ଚା ଦୋକାନ ଚଳାଇବାରେ ସାହାଯ୍ୟ କରୁଥିବା ଡି. ପ୍ରକାଶ କିନ୍ତୁ ଜାଣିନଥିଲେ ଯେ ସେହି ଦୋକନରୁ ରୋଜଗାର କରୁଥିବା ଅର୍ଥରେ ସେ ବସ୍ତି ପିଲାଙ୍କୁ ପାଠ ପଢ଼ାଇ ବଡ଼ କରିବେ। ୫ଟଙ୍କାରେ ଆରମ୍ଭ କରିଥିବା ଚା ଦୋକାନ ଏବେ ଡି. ପ୍ରକାଶ ରାଓଙ୍କୁ ଦେଇଛି ଏହି ଅନନ୍ୟ ପରିଚୟ।