ଭୁବନେଶ୍ୱର : ପ୍ରସିଦ୍ଧ ସଂଗୀତ ନିର୍ଦେଶକ ପ୍ରେମ୍ ଆନନ୍ଦଙ୍କୁ ମିଳିଛି ଓଡ଼ିଶା ଏକ୍ସଲେନ୍ସ ଆୱାର୍ଡ। ସ୍ଥାନୀୟ ରବୀନ୍ଦ୍ର ମଣ୍ଡପଠାରେ ଆୟୋଜିତ ଏକ ରଙ୍ଗାରଙ୍ଗ କାର୍ଯ୍ୟକ୍ରମ ଅବସରରେ ମହାମହିମ ରାଜ୍ୟପାଳ ଗଣେଶୀ ଲାଲ, ବିଶିଷ୍ଟ ସ୍ୱାଧୀନତା ସଂଗ୍ରାମୀ ଗୌରହରୀ ଦାସ ସଂଗୀତ ନିର୍ଦେଶକ ପ୍ରେମ୍ ଆନନ୍ଦଙ୍କୁ ଏହି ଆୱାର୍ଡ ପ୍ରଦାନ କରିଥିଲେ। ଓଡ଼ିଆ ମିଡିଆ ଦ୍ୱାରା ଆୟୋଜିତ ଏହି କାର୍ଯ୍ୟକ୍ରମରେ ଓଡ଼ିଆ ମିଡିଆର ନିର୍ଦେଶକ ଶୁଭ୍ରାଂଶୁ ପଣ୍ଡାଙ୍କ ସମେତ ବିଭିନ୍ନ କ୍ଷେତ୍ରରେ କୃତିତ୍ୱ ହାସଲ କରିଥିବା ଓଡ଼ିଶାର ବିଶିଷ୍ଟ ବ୍ୟକ୍ତି ବିଶେଷଙ୍କ ଉପସ୍ଥିତିରେ ଏହି ଆୱାର୍ଡ ପ୍ରଦାନ କରାଯାଇଥିଲା।
ପୂର୍ବରୁ ରାଜ୍ୟ ଚଳଚ୍ଚିତ୍ର ପୁରସ୍କାର, ଓଡ଼ିଆ ଫିଲ୍ମ ଫେୟାର ଆୱାର୍ଡ, ରେଡିଓ ଚକୋଲେଟ ଆୱାର୍ଡ, ତରଙ୍ଗ ସିନେ ଆୱାର୍ଡ, ଜି-ସାର୍ଥକ ଆୱାର୍ଡ ଭଳି ମର୍ଯ୍ୟାଦାଜନକ ଆୱାର୍ଡର ଅଧିକାରୀ ପ୍ରେମ୍ ଆନନ୍ଦ ଓଡ଼ିଆ, ହିନ୍ଦୀ ଓ ମରାଠୀ ସିନେମାରେ ସଂଗୀତ ନିର୍ଦେଶନା ଦେଇ ପ୍ରସିଦ୍ଧି ହାସଲ କରିଛନ୍ତି। ଅଦ୍ୟାବଧି ସେ ୫୫ଟି ଓଡ଼ିଆ ସିନେମାରେ ସଂଗୀତ ନିର୍ଦେଶନା ଦେଇ ମାଇଲଖୁଣ୍ଟ ତିଆରି କରିଛନ୍ତି।
