ଡାକ ଯୋଗେ ଭୋଟ୍‍ ଦେଇପାରିବେ ୮୦ବର୍ଷରୁ ଅଧିକ ବରିଷ୍ଠ ନାଗରିକ ଓ ଭିନ୍ନକ୍ଷମ

ନୂଆଦିଲ୍ଲୀ :  ୮୦ ବର୍ଷ ବୟସରୁ ଅଧିକ ବରିଷ୍ଠ  ନାଗରିକ ଏବଂ ଭିନ୍ନକ୍ଷମମାନେ ଏଣିକି ଡାକ ଯୋଗେ ଭୋଟ୍‍ ଦେଇପାରିବେ। ତେବେ ସେମାନଙ୍କ ପାଇଁ ଦୁଇ ପ୍ରକାରର ବିକଳ୍ପ ରହିବ। ସେମାନେ ଡାକ ଯୋଗ ପୋଷ୍ଟାଲ ବାଲାଟରେ ଭୋଟ ଦେଇ ପାରିବେ ଅବା ନିଜ ଘର ପାଖରେ ଥିବା ମତଦାନ ଦିନ ଭୋଟ ଗ୍ରହଣ କେନ୍ଦ୍ରକୁ ଯାଇ ଭୋଟ ଦେଇ ପାରିବେ। ଏହି ଶ୍ରେଣୀର ଭୋଟ୍‍ଦାତା ମାନଙ୍କ ପାଇଁ ଭୋଟ୍‍ଦାନ ବ୍ୟବସ୍ଥାକୁ ସହଜ କରିବା ନିମନ୍ତେ ନିର୍ବାଚନ ଆୟାଗ ପକ୍ଷରୁ ଏଭଳି ପଦକ୍ଷେପ ନିଆଯାଇଛି ।

ନିର୍ବାଚନ ଆୟୋଗଙ୍କ ସୁପାରିଶ କ୍ରମେ କେନ୍ଦ୍ର ଆଇନ ଓ ନ୍ୟାୟ ମନ୍ତ୍ରଣାଳୟ ପକ୍ଷରୁ ଏଥିଲାଗି ୧୯୬୧ ମସିହା ନିର୍ବାଚନ ଆଚରଣ ନିୟମରେ ସଂଶୋଧନ କରାଯାଇଛି । ଏହି ସଂଶୋଧନ ଅନୁଯାୟୀ ନିର୍ବାଚନ ପାଇଁ ବିଜ୍ଞପ୍ତି ଜାରି ହେବାର ୫ ଦିନ ମଧ୍ୟରେ ଏଭଳି ମତଦାତା ମାନେ ୧୨-ଡି ଫର୍ମରେ ଆବେଦନ କରିପାରିବେ। ଏହି ଆବେଦନ ପାଇବା ପରେ ତାଙ୍କୁ ପୋ​ଷ୍ଟାଲ ବାଲାଟ ପେପର​‌ ପ୍ରଦାନ କରାଯିବ। ମତଦାନ ପରେ ସେମାନେ ନିର୍ଦ୍ଧାରିତ କେନ୍ଦ୍ରରେ ତାଙ୍କ ପୋ​ଷ୍ଟାଲ ବାଲାଟ ପେପର​‌ ଜମା କରିବେ।