ଲକ୍ଷ୍ନୌ : ବିଗ୍-ବି ଅମିତାଭ ବଚ୍ଚନଙ୍କ ଅଭିନୀତ ଲୋକପ୍ରିୟ ଫିଲ୍ମ ‘ସରାବି’ର ଏକ ମନଛୁଆଁ ସଂଳାପ ଥିଲା ‘ମୁଚ୍ଛେ ହୋ ତୋ ନଥୁଲାଲ୍ ଜୀ ଜୈସି ହୋ, ବରନା ନା ହୋ’ ଅର୍ଥାତ ନିଶ ରଖିବ ତ’ ନଥୁଲାଲଙ୍କ ଭଳି ନହେଲେ ନାହିଁ। ଆଜି ସେଇ ‘ନିଶ’ର ଆଦର ବଢିଛି । ମୋଟା ତଥା ନିଶୁଆ ଲୋକଙ୍କୁ ସରକାର ମାସିକ ୨୫୦ ଟଙ୍କାର ଭତ୍ତା ଦେବେ। ତେବେ ଏହା ସାଧାରଣ ଲୋକଙ୍କ ପାଇଁ ନୁହେଁ ନିଶୁଆ ପୁଲିସଙ୍କ ପାଇଁ ।
ଆଜ୍ଞା ହଁ ନିଶୁଆ ପୁଲିସଙ୍କ ପାଇଁ ଖୁସି ଖବର; କାରଣ ଉତ୍ତରପ୍ରଦେଶ ପୁଲିସ କର୍ତ୍ତୃପକ୍ଷ ନିଶ ରଖୁଥିବା କର୍ମଚାରୀଙ୍କୁ ପୁରସ୍କୃତ କରିବାକୁ ଘୋଷଣା କରିଛନ୍ତି। କେବଳ ସେତିକି ନୁହେଁ; ସେମାନଙ୍କ ପାଇଁ ନିଶର ରକ୍ଷଣାବେକ୍ଷଣ ବାବଦ ଭତ୍ତା ୪୦୦ପ୍ରତିଶତ ବୃଦ୍ଧି କରିଛନ୍ତି। ଉତ୍ତରପ୍ରଦେଶ ପାଦେଶିକ ସଶସ୍ତ୍ର ପୁଲିସବାହିନୀ କ୍ଷେତ୍ରରେ ଏହା ଲାଗୁ ହେବ। ଏହି ବାହିନୀରେ ମୋଟ ୩୩ଟି ବାଟାଲିୟନ ରହିଛି। ଏହାର କନ୍ଷ୍ଟେବଳମାନେ ବଡ଼ ବଡ଼ ନିଶ ରଖିଛନ୍ତି। ପୂର୍ବରୁ ସେମାନଙ୍କୁ ନିଶ ରକ୍ଷଣାବେକ୍ଷଣ ବାବଦରେ ମାସିକ ୫୦ଟଙ୍କା ମିଳୁଥିଲା; କିନ୍ତୁ ଏବେ ଏହାକୁ ୨୫୦ ଟଙ୍କାକୁ ବୃଦ୍ଧି କରାଯାଇଛି ବୋଲି କହିଛନ୍ତି ବାହିନୀ ମୁଖ୍ୟ ଅତିରିକ୍ତ ପୁଲିସ ମହାନିର୍ଦେଶକ(ଏଡିଜି) ବିନୋଦ କୁମାର ସିଂହ। ପୁଲିସ କର୍ମଚାରୀଙ୍କ ମଧ୍ୟ ବଡ଼ ନିଶ ରଖିବା ପରମ୍ପରା ହ୍ରାସ ପାଉଥିବାରୁ ଏହାର ପୁନରୁଦ୍ଧାର ପାଇଁ ଏଭଳି ପଦକ୍ଷେପ ନିଆଯାଇଥିବା ସିଂହ କହିଛନ୍ତି। ବଡ଼ ନିଶ ପୁଲିସ କର୍ମଚାରୀଙ୍କ ବ୍ୟକ୍ତିତ୍ବ ବୃଦ୍ଧି କରିଥାଏ ବୋଲି ସେ ମତବ୍ୟକ୍ତ କରିଛନ୍ତି।